واشنگٹن: امریکی ریاست ٹیکساس میں بینک کی غلطی کے باعث رتھ بالون نامی خاتون ارب پتی بن گئی۔
تفصیلات کے مطابق امریکی ریاست ٹیکساس میں ڈیلاس سے تعلق رکھنے والی خاتون اس وقت حیران رہ گئی جب ہفتے کے آغاز میں اپنا اکاؤنٹ چیک کیا تو اس میں 3 کروڑ 70 لاکھ امریکی ڈالر یعنیٰ (5 ارب 73 کروڑ) پاکستانی روپے تھے۔
امریکی خاتون کا کہنا تھا کہ بینک کے اوقات کار ختم ہونے کی وجہ سے وہ اس رقم کے حوالے سے بینک سے بات نہ کرسکی۔ خاتون نے اس ٹرانزیکشن کا اسکرین شاٹ اپنے شوہر کو بھیجا اور پوچھا کہ ہمارے اکاؤنٹ میں اتنے پیسے کہاں سے آئے؟
بعدازاں بینک نے خود خاتون سے رابطہ کیا اور انہیں بتایا کہ یہ کوئی تحفہ نہیں ہے بلکہ یہ بینک کی طرف سے ہونے والی ایک غلطی ہے، بینک نے معذرت کرتے ہوئے خاتون کے اکاؤنٹ سے رقم واپس نکلوالی۔
رتھ بالون کا کہنا تھا کہ اکاؤنٹ میں رقم دیکھتے ہی اپنے خوابوں کو پورا کرنے کے بارے میں سوچنا شروع کر دیا تھا، کاش ایسا ہوتا کہ کوئی ہمیں واقعی 3 کروڑ 70 لاکھ ڈالر دے دیتا، میں کروڑ پتی بن جاتی۔
امریکی شہری نے لاٹری ٹکٹ سے 24 کروڑ 56 لاکھ ڈالر جیت لیے
یاد رہے کہ گزشتہ سال ستمبر میں امریکی شہری منگل نے اپنی ناقابل یقین قسمت کے باعث امریکا کی پاور بال نامی لاٹری کے ٹکٹ سے 24 کروڑ 56 لاکھ ڈالر کی خطیر رقم انعام میں جیت لی تھی۔
