ریاض : سعودی عرب کی کنگ عبدالعزیز اکیڈمی نے 100 سال پرانے مدینہ منورہ کی تصویر جاری کردی۔
تفصیلات کے مطابق سعودی شہر مدینہ منورہ کا سو برس قبل کیسا تھا اور اس دوران اس عظیم و قدیم شہر میں کیا تبدیلیاں رونما ہوئیں اسے پرانی تصویر کی مدد لیے بغیر جاننا بے حد مشکل ہے لہذا مدینہ منورہ کے جدید و قدیم تصاویر کے ذریعے اس شہر کی کہانی کو سمجھا جاسکتا ہے۔
سعودی عرب کی معروف کنگ عبدالعزیز اکیڈمی نے مدینہ منورہ کی 1913 کی ایک پُرانی تصویر جاری کی ہے۔ جس میں شہر کے چھوٹے سے رقبے کو دیکھا جاسکتا ہے اور اس میں مسجد نبوی کا رقبہ بھی بہت کم ہے۔
اس دور میں مدینہ منورہ میں نخلستانوں کے مناظر عام تھے جو تصویر میں بھی نظر آرہا ہے۔
نئے مدینہ منورہ کی تصویر 2019 میں شمال مغربی پہاڑ سلع کی چوٹی سے لی گئی ہے۔ اس میں مدینہ منورہ وسیع و عریض اور جدید شکل میں دیکھا جاسکتا ہے۔ اس سے مسجد نبوی شریف کا وسیع وعریض رقبہ بھی نمایاں ہورہا ہے۔
عرب خبر رساں ادارے کا کہنا تھا کہ ’دارالمدینہ المنورہ‘عجائب گھر میں بھی مدینہ منورہ کی تاریخ اور ثقافت دیکھنے کو ملتی ہے۔
عجائب گھر اب تک مدینہ منورہ کے تاریخی اور قابل دید مقامات سے متعلق 44 سے زائد کتب شائع کر چکا ہے، مدینہ منورہ کی تہذیب و تمدن پر خصوصی ریسرچ بھی کرارہا ہے۔
غیر ملکی خبر رساں ادارے کا کہنا تھا کہ عجائب گھر میں 2 ہزار سے زائد نوادرات موجود ہیں، عجائب گھر میں تاریخی مقامات اور واقعات کو اجاگر کرنیوالے ماڈلز بھی رکھے گئے ہیں جبکہ اسلام کے ابتدائی عہد سے جدید دور تک اسلامی سکے بھی ہیں۔
