راولپنڈی: قومی احتساب بیورو ( نیب) نے سابق وزیر داخلہ و مسلم لیگ (ن) کے مرکزی رہنما احسن اقبال کو گرفتار کر لیا۔
تفصیلات کے مطابق نیب راولپنڈی نے احسن اقبال کو نارووال اسپورٹس سٹی کرپشن کیس میں گرفتار کیا ہے اور انہیں کل احتساب عدالت میں پیش کیا جائے گا۔
میڈیکل ٹیم آج زیر حراست احسن اقبال کاطبی معائنہ کرے گی۔
نیب کی جانب سے جاری اعلامیہ میں کہا گیا ہے کہ سابق وزیر داخلہ احسن اقبال کو گرفتار کر لیا گیا، ان کی گرفتاری نارووال اسپورٹس کمپلیکس کی تحقیقات کے لیے عمل میں لائی گئی۔
اعلامیہ کے مطابق احسن اقبال کو جسمانی ریمانڈ کے لیے کل احتساب عدالت پیش کیا جائے گا۔
قبل ازیں میڈیا سے بات کرتے ہوئے احسن اقبال کا کہنا تھا کہ نارووال اسپورٹس سٹی پرآج تک ڈھائی ارب خرچ ہوئے جب ڈھائی ارب خرچ ہوئے تو 6ارب کی کرپشن کیسے ہوسکتی ہے؟
انہوں نے کہا کہ ہم اس ملک کو حکومت کی نالائقی اور تباہی سےبچائیں گے، جھوٹ بو ل بول کر (ن) لیگ کی کردار کشی کی گئی ہے، حکومت نیب کا نام اپنے ایجنڈے کیلئے استعمال کررہی ہے اور نیب کو استعمال کرکے مخالفین کی کردارکشی کررہی ہے۔
دوسری جانب نیب نے رکن اسمبلی کی گرفتاری سے متعلق اسپیکر قومی اسمبلی اسد قیصر کو آگاہ کردیا ہے.
