اسلام آباد: وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ وزیر اعظم عمران خان 26 دسمبر کو پنڈ دادن خان کا دورہ کریں گے۔
تفصیلات کے مطابق وفاقی وزیر فواد چوہدری کا کہنا ہے کہ وزیر اعظم عمران خان عوامی رابطہ مہم کا آغاز پنڈ دادن خان سے کریں گے، عمران خان جلالپورشریف تا خوشاب نہر کا سنگ بنیاد رکھیں گے۔
وفاقی وزیر برائے سائنس اینڈ ٹیکنالوجی نے کہا کہ وزیر اعظم جہلم کے لیے اہم میگا پراجیکٹس کا اعلان کریں گے۔ وزیراعظم بننے کے بعد عمران خان جہلم کا پہلا دورہ کریں گے۔ وزیر اعظم کے جلسے کی تیاریاں زور و شور سے جاری ہیں،ہیلی پیڈ بنا دیا گیا ہے۔
یاد رہے کہ گزشتہ ماہ وزیراعظم عمران خان نے دورہ لاہور کے دوران وزیراعلیٰ پنجاب اور گورنر پنجاب سمیت دیگر پارٹی رہنماؤں سے ملاقات کی تھی۔
وزیراعظم عمران خان اور وزیراعلیٰ پنجاب نے اعلیٰ سطحی اجلاس کی مشترکہ صدارت کی تھی آئی جی پنجاب اور چیف سیکرٹرئ اعظم سلیمان نے وزیراعظم سے خصوصی ملاقات کی تھی۔
