مکہ مکرمہ: سعودی عرب میں پاکستانی ڈرائیور نے ایسا کارنامہ انجام دیا جس پر ملکی انتظامیہ داد دیے بغیر نہ رہ سکی۔
تفصیلات کے مطابق سعودی عرب کے شہر مکہ مکرمہ میں ایک پاکستانی ٹینکر ڈرائیور نے سعودی خاندان کو جانی نقصان سے بچالیا، اس عظیم کارنامے پر ملکی انتظامیہ بھی پاکستانی کی معترف ہوگئی۔
غیر ملکی خبررساں ادارے کے مطابق سعودی خاندان مکہ کی سبت الجارۃ نامی شاہراہ پر سفر کررہا تھا کہ اچانک گاڑی میں آگ بھڑک اٹھی، پاس سے گزرتے ٹینکر ڈرائیور نے انسانیت کا ثبوت دیتے ہوئے اپنی مدد آپ کے تحت ایکشن لیا۔
شہری دفاع سے متعلق انتظامیہ کے جائے وقوعہ پر پہنچے سے پہلے ہی پاکستانی ڈرائیور نے آگ پر قابو پالیا۔
ٹینکر ڈرائیور نے پہلے گاڑی سے بچوں کو نکالا بعد ازاں اپنے ٹینکر میں موجود پانی سے بھڑکتی ہوئی آگ کو ٹھنڈا کردیا۔ سول ڈیفنس ٹیم جائے وقوعہ پر منظر دیکھ کر حیران رہ گئی اور اس کارخیر پر پاکستانی کو شکریہ ادا کیا۔
سعودی شہری کا کہنا تھا کہ ڈرائیور نے ناصرف میری اور بچوں کی جان بچائی بلکہ میری گاڑی کو بھی بڑی تباہی سے بچالیا، اگر یہ شخص فوری کارروائی نہ کرتا تو شہری دفاعی انتظامیہ کے پہنچے سے پہلے ہی گاڑی جل کر خاکستر ہوجاتی۔
