کوالالمپور: ملائیشیا میں ہولناک حادثہ پیش آیا جہاں قیمہ بنانے والی ہیوی مشین نے انسان کے پیٹ کا قیمہ بنا دیا جس کے باعث وہ موقع پر ہی ہلاک ہوگیا۔
تفصیلات کے مطابق یہ واقعہ ملائیشیا کی ریاست ملاکا میں پیش آیا، مزدور قیمہ بنانے والی مشین کا مرمتی کام کررہا تھا کہ اچانک مشین چل پڑی اور نیپالی شہری کو دبوچ لیا۔
غیر ملکی خبررساں ادارے کے مطابق ہلاک ہونے والے 47 سالہ شخص کا تعلق نیپال سے ہے جو ملائیشیا کی ’’میٹ پروسیسنگ فیکٹری‘‘ میں ملازمت کرتا تھا، پولیس نے موت سے متعلق تحقیقات بھی شروع کردی ہے۔
جبکہ جائے وقوعہ پر دیگر تین ورکرز بھی کام میں مصروف تھے، مرمتی کام کے دوران اچانک مشین آن ہونے پر نیپالی شخص کا پیٹ مشین میں آیا بعد ازاں چکی میں پورا جسم پھنس گیا، 30 منٹ کی محنت کے بعد شہری کی لاش باہر نکالی گئی۔
خیال رہے کہ بہتر روزگار کے سلسلے میں بہت بڑی تعداد نیپالیوں کی ملائیشیا کا رخ کرتی ہے، ایک اندازے کے مطابق تقریباً 3 لاکھ 60 ہزار نیپالی یہاں بستے ہیں، جو مزدوری سمیت دیگر ملازمت کے پیشوں سے وابستہ ہیں۔
یاد رہے کہ گزشتہ سال ملائیشیا میں 300 سے زائد نیپالی مختلف حادثات یا خودکشی کے نتیجے میں مارے گئے۔
