تازہ ترین

پہلی سعودی خاتون امریکی عدالت میں معاون جج مقرر

ریاض: سعودی عرب کی پہلی خاتون کو امریکا کی ایک عدالت میں معاون جج تعینات کردیا گیا، خاتون امریکا میں زیر تعلیم ہیں۔

سعودی ویب سائٹ کے مطابق امریکی عدالت نے سرکاری اسکالر شپ پر زیر تعلیم سعودی اسکالر خاتون کو معاون جج تعینات کر دیا۔

سعودی اسکالر خاتون ہیا الشمری نے سماجی رابطے کی ویب سائٹ ٹویٹر پر بتایا کہ انہیں امریکی عدالت میں معاون جج کے طور پر تعینات کیا گیا ہے۔

عدالت میں سعودی اسکالر کی حیثیت رضا کارانہ ہوگی، وہ اس وقت امریکا میں قانون کی اعلیٰ تعلیم حاصل کر رہی ہیں۔ الشمری نے کنگ سعود یونیورسٹی کی فیکلٹی آف لا سے ایل ایل بی کیا ہے جبکہ وہ قانون میں اعلیٰ ڈپلومہ بھی حاصل کرچکی ہیں۔

وہ اعلیٰ تعلیم اور وکالت کی پریکٹس کے لیے اسکالر شپ پر امریکا گئی ہیں جہاں وہ قانون میں ماسٹرز کر رہی ہیں۔ الشمری پہلی سعودی اسکالر خاتون ہیں جنہیں امریکی عدالت میں معاون جج بنایا گیا ہے۔

خیال رہے کہ گزشتہ روز مملکت کی نائب وزیر برائے پائیدار ترقی اور جی 20 کے امور کی معاون، شہزادی ہیفا بنت عبد العزیز آل مقرن کو اقوام متحدہ کی تعلیمی، سائنسی اور ثقافتی تنظیم (یونیسکو) میں سعودی عرب کی مستقل مندوب مقرر کیا گیا۔

شہزادی ہیفا نے سنہ 2008 سے 2009 کے دوران کنگ سعود یونیورسٹی میں لیکچرار کی حیثیت سے کام کیا۔ وہ دسمبر 2017 سے پائیدار ترقیاتی امور کے اسسٹنٹ انڈر سیکریٹری سمیت وزارت اقتصادیات اور منصوبہ بندی میں اہم عہدوں پر فائز ہیں۔

Comments

- Advertisement -