اسلام آباد: ایرانی وزارت خارجہ نے کہا کہ ایرانی قدس فورس کے نئے سربراہ اسماعیل قاآنی کو امریکی دھمکی ریاستی دہشت گردی ہے۔
تفصیلات کے مطابق ایرانی وزارت خارجہ کا کہنا ہے کہ قدس فورس کے نئے سربراہ اسماعیل قاآنی کو دھمکی دینا ریاستی دہشت گردی ہے، عالمی برادری امریکا کی ریاستی دہشت گردی کی مذمت کرے۔
امریکی مندوب برائن ہوک کا گزشتہ روز کہنا تھا کہ قدس فورس کے نئے سربراہ کی جانب سے امریکیوں کو نشانہ بنایا گیا تو ان کا انجام قاسم سلیمانی جیسا ہوگا۔
برائن ہوک کا کہنا تھا کہ امریکی صدر ڈونلڈ ٹرمپ یہ پہلے ہی واضح کرچکے ہیں کہ اگر کسی امریکی یا امریکی مفاد پر حملہ کیا گیا تو اس کا بھرپور جواب دیا جائے گا۔
امریکی مندوب کا کہنا تھا کہ یہ کوئی نئی دھمکی نہیں ہے، صدر ٹرمپ نے ہمیشہ یہی کہا ہے کہ وہ امریکی مفادات کے تحفظ کے لیے بھرپور اقدامات اٹھائیں گے۔
امریکی بزدلی کا مردانگی سے جواب دیں گے: سربراہ القدس فورس
یاد رہے کہ تین روز قبل اسماعیل قاآنی کا اپنے خطاب میں کہنا تھا کہ امریکا نے بزدلی سے ہمارے عظیم جنرل کو قتل کیا، ہم اس کے جواب میں مردانگی کے ساتھ دشمن سے بدلہ لیں گے۔
