اسلام آباد : وزیراعظم عمران خان اتوار کو دورہ لاہور میں تحریک انصاف کے ناراض گروپ سے ملاقات کرکے ان کے مطالبات خودسنیں گے، اس معاملے پر بڑا بریک تھرو ہونے امکان ہے۔
تفصیلات کے مطابق وزیراعظم عمران خان اتوار کو لاہورکا دورہ کریں گے، اس دوران تحریک انصاف کےناراض اراکین کےمعاملےپر بڑا بریک تھرو ہونے امکان ہے۔
ذرائع کا کہنا ہے کہ وزیر اعظم عمران خان ناراض گروپ سےملاقات کریں گے اور ان کے مطالبات خودسنیں گے، وزیراعلیٰ پنجاب ناراض اراکین کی ملاقات سے پہلے وزیر اعظم سے ملاقات کریں گے۔
دورے میں وزیر اعظم پنجاب کےاراکین قومی و صوبائی اسمبلی سے بھی ملاقات کریں گے جبکہ پنجاب کی اتحادی سیاست پر بھی وزیر اعظم کی اہم ملاقاتیں ہوں گی۔
وزیراعظم صوبائی کابینہ سے ملاقات اور امن وامان پر اجلاس میں شریک ہوں گے جبکہ صوبائی وزراکی کارکردگی پربھی وزیراعلیٰ بریفنگ دیں گے۔
مزید پڑھیں : وزیراعلیٰ پنجاب کی جہانگیر ترین سے ملاقات
یاد رہے وزیراعلی پنجاب سردار عثمان بزدار نے میڈیا سے گفتگو کرتے ہوئے کہا تھا کہ پنجاب میں تبدیلی کی افواہیں پھیلانے والے سازشیں کر رہے ہیں، حکومت کے تمام اسٹیک ہولڈرز ایک پیج پر ہیں، پنجاب میں فارورڈ بلاک ہے نہ پریشرگروپ،اتحادی بھی ساتھ ہیں۔
سردار عثمان بزدار کا کہنا تھا کہ جنوبی پنجاب کی ترقی کے لیے35 فیصد فنڈز مختص کیے گئے ہیں، جنوبی پنجاب کے فنڈز کسی اور علاقے پرخرچ نہیں ہوسکیں گے، علاقےکی ترقی،عوام کے مسائل کے حل کے لیے مل کرکام کر رہے۔
خیال رہے پنجاب میں پی ٹی آئی کا فاروڈ بلاک سامنے آیا تھا ذرائع کا کہنا تھا کہ پی ٹی آئی کے ناراض ارکان کا گروپ بنانے میں ممکنہ طور پر وزیراعلیٰ پنجاب کا اپنا ہاتھ ہے، وزیراعلیٰ پنجاب نے ہی اپنے مخصوص لوگوں کو ناراض ہونے کا عندیہ دیا تھا کیونکہ وزیراعظم عمران خان نے پنجاب کےمعاملات کی براہ راست ذمے داری چیف سیکرٹری کوسونپی تھی۔
