اسلام آباد: وزیر خارجہ شاہ محمود قریشی کا کہنا ہے کہ چین نے متاثرہ علاقوں میں نقل وحرکت پر پابندی لگا رکھی ہے، اطلاعات کے مطابق کوئی پاکستانی وائرس سے متاثر نہیں ہے۔
تفصیلات کے مطابق وزیر خارجہ شاہ محمود قریشی کا کہنا ہے کہ چینی وزارت خارجہ کے ساتھ بیجنگ سے مسلسل رابطے میں ہیں، چینی صوبے ووہان میں 500 کے قریب رجسٹرڈ طلبا ہیں، نان رجسٹرڈ کو شامل کر کے تعداد 800 کے درمیان بنتی ہے۔
انہوں نے کہا کہ چین نے متاثرہ علاقوں میں نقل وحرکت پر پابندی لگا رکھی ہے، اطلاعات کے مطابق کوئی پاکستانی وائرس سے متاثر نہیں ہے۔
وزیر خارجہ نے کہا کہ نان رجسٹرڈ طلبا کی رجسٹریشن کے لیے 2 افسران مامور کر دیے ہیں، ان کے نمبرز بھی سفارت خانے کی ویب سائٹ پر مشتہر کر دیے گئے۔
شاہ محمود قریشی کا کہنا تھا کہ طلبا رجسٹریشن یا کسی بھی معلومات کے لیے سفارت خانے سے رابطہ کرسکتے ہیں، چینی وزارت خارجہ، پاکستانی سفارت خانے سے مسلسل رابطے میں ہیں۔
انہوں نے کہا کہ ہم نے کھانا نہ ملنے کی شکایت پر بھی چینی وزارت خارجہ سے رجوع کیا، چینی وزارت خارجہ نے بتایا متاثرہ علاقے میں کھانا بھجوا رہے ہیں، گھبرانے کی ضرورت نہیں ہے احتیاط سے کام لینے کی ضرورت ہے۔
وزیر خارجہ کا کہنا تھا کہ چینی حکام ہمارے ساتھ مکمل تعاون کر رہے ہیں، اپنے شہریوں کی زندگیوں کو محفوظ بنانے کے لیے مل کر صورت حال سے نمٹنا ہے۔
چین میں محصور سیکڑوں پاکستانی طلبہ کو کروناوائرس کا خوف، حکومت سے مدد کی اپیل
واضح رہے کہ چین میں کروناوائرس کے باعث سیکڑوں پاکستانی طلبہ ووہان میں پھنس گئے، اپنے ویڈیو پیغام میں طالبات نے حکومت سے وطن واپسی میں مدد کرنے کی اپیل کردی۔
