اسلام آباد: احساس کفالت کارڈ سے بے نظیر بھٹو اور نواز شریف کی تصاویر کیوں ہٹائی گئیں؟ وزیر اعظم کی معاون خصوصی ثانیہ نشتر نے بتا دیا۔
تفصیلات کے مطابق وزیر اعظم عمران خان کی معاون خصوصی ثانیہ نشتر نے اے آر وائی نیوز سے گفتگو کرتے ہوئے بتایا کہ احساس کفالت کارڈ سے سابق وزرائے اعظم بے نظیر بھٹو اور نواز شریف کی تصاویر ہٹا دی گئی ہیں، سیاسی تصاویر ہٹانے کا فیصلہ وزیر اعظم کی مشاورت سے کیا۔
ثانیہ نشتر کا کہنا تھا کہ وزیر اعظم عمران خان نے خود اس فیصلے کی منظوری دی، یہ فیصلہ بھی کیا ہے کہ آئندہ کارڈ پر صرف قائد اعظم کی تصویر ہوگی۔
انہوں نے کہا کہ سماجی تحفظ کے اداروں کا سیاست کے لیے استعمال کیا جاتا تھا، حکومت نے سماجی اداروں کو سیاست سے پاک رکھنے کا فیصلہ کیا ہے۔
معاون خصوصی کا مزید کہنا تھا کہ قائد کی تصویر ثبوت ہے کہ حکومت سماجی اداروں کا سیاسی استعمال روکے گی، کفالت پروگرام کے ذریعے انتہائی غریب افراد کی ماہانہ مدد کریں گے۔ مستحق خواتین کے بچت بینک اکاؤنٹس بھی کھولے جائیں گے۔
خیال رہے کہ وزیر اعظم عمران خان آج احساس کفالت پروگرام کا افتتاح کریں گے، پروگرام کے تحت بیوہ خواتین سمیت نادار افراد کی مالی امداد اور انتہائی مستحق افراد کو 2 ہزار روپے ماہانہ رقم دی جائے گی۔
بے نظیر کارڈ ختم کر کے مستحقین کو احساس کفالت کارڈ پر وظیفہ ملے گا، کارڈ سے نواز شریف اور بے نظیر کی تصاویر ختم کر کے صرف قائد اعظم کی تصویر لگے گی۔
حکومت ہر ماہ 70 لاکھ خواتین کو ماہانہ 2 ہزار روپے دے گی جبکہ بی آئی ایس پی کے 40 لاکھ بینی فشریز بھی کفالت پروگرام میں شامل ہیں۔
