وقت کی تقسیم، یعنی ثانیوں کو منٹوں میں اور انھیں گھنٹوں میں شمار کرتے ہوئے دنوں، ہفتوں اور مہینوں کے بعد سال اور صدیوں تک پہچان اور شناخت دیتے ہوئے ان کا حساب رکھنا ایک فن اور ریاضت رہا ہے جسے ہم انسانوں نے ارتقائی مراحل طے کرتے ہوئے کیلنڈر کی شکل دے دی۔
کیلنڈر کی بات کی جائے تو یہ سورج اور چاند دونوں کی حرکت کے مطابق تیار کیے گئے۔ کلینڈروں کی تاریخ اور ان کی قمری یا شمسی اعتبار سے تقسیم دفتر طلب اور باقاعدہ موضوع ہے۔
کیا آپ جانتے ہیں کہ جس طرح عیسوی سال کے دنوں کا حساب و شمار کرنے کے بعد کلینڈر کے مطابق اس کا ہفتہ سات دنوں کا ہوتا ہے، اسی طرح ہمارے اسلامی کیلنڈر میں بھی ہفتے کے سات دن مقرر ہیں؟
اسلامی یا ہجری کیلنڈر کے سات دنوں میں سے پہلا الاحد (یکشنبہ) ہے جسے اوہد بھی کہتے تھے، دوسرا دن الاثنین (دو شنبہ) ہوتا ہے جسے اہون بھی کہتے رہے ہیں۔ اسی طرح تیسرا دن الثلاثا (سہ شنبہ) ہے جسے اور جُبار بھی کہا جاتا تھا۔ ہجری کیلنڈر کے مطابق ہفتے کا چوتھا دن الاربعا (چہار شنبہ) کہلاتا ہے جب کہ اسی دن کو دُبار بھی کہتے تھے۔ اسلامی ہفتے کا پانچواں دن الخمیس (پنجشنبہ) اور یہی مؤنس بھی پکارا جاتا رہا جب کہ چھٹا دن وہ مبارک دن ہے جسے اسلامی دنیا میں الجمعہ (جمعہ) اور اکثر عروبہ بھی کہتے ہیں۔
اب ہفتے کے آخری دن کی طرف چلتے ہیں جسے عام طور پر ہم ساتواں دن کہتے ہیں۔ اسے ہجری کیلنڈر کے مطابق عرب دنیا السبت (شنبہ) کے نام سے پہچانتی ہے۔
