اسلام آباد: سینیٹ میں ارکان پارلیمان کی تنخواہوں میں اضافے کا بل کثرت رائے سے مسترد کر دیا گیا، تحریک انصاف، مسلم لیگ ن، پیپلزپارٹی اور جماعت اسلامی کی جانب سے بل کی مخالفت کی گئی۔
تفصیلات کے مطابق وفاقی دارالحکومت اسلام آباد میں چیئرمین سینیٹ صادق سنجرانی کی زیر صدارت اجلاس ہوا جس میں آزاد رکن سینیٹر نصیب اللہ بازئی نے ارکان پارلیمان کی تنخواہوں میں اضافے سے متعلق بل پیش کیا۔
چیئرمین سینیٹ نے بل کی منظوری کے لیے ووٹنگ کرائی، تنخواہیں بڑھانے کے بل کی حمایت میں 16 اور مخالفت میں 29 ووٹ آئے۔ سینیٹ میں حکومتی پارٹی کی جانب سے بل کی مخالفت کی گئی۔
اپوزیشن کی بڑی جماعتوں نے بھی بل کی حمایت نہیں کی، پیپلز پارٹی،ن لیگ،جماعت اسلامی نے بل کی مخالفت کی۔ اے این پی، جے یو آئی ف، پی کے میپ کی جانب سے بل کی حمایت کی گئی۔
جب تک ایک مزدورکی آمدن نہیں بڑھتی، ہمیں اپنی تنخواہ نہیں بڑھانی چاہیے، سینیٹر فیصل جاوید
اس سے قبل سینیٹ اجلاس میں سینیٹر فیصل جاوید نے اظہار خیال کرتے ہوئے کہا تھا کہ جب تک ایک مزدورکی آمدن نہیں بڑھتی ہمیں اپنی تنخواہ نہیں بڑھانی چاہیے، وزیراعظم عمران خان نے اپنی تنخواہ میں کوئی اضافہ نہیں کیا۔
