اسلام آباد: وفاقی وزیر مراد سعید کا کہنا ہے کہ ہم کشتیاں جلا چکے ہیں، کشمیر کو آزاد کروا کر رہیں گے۔ بھارت کے اندر سے بھی اب آواز آتی ہے کہ کشمیر اندرونی مسئلہ نہیں ہے۔
تفصیلات کے مطابق وفاقی وزیر مواصلات مراد سعید نے تقریب سے خطاب کرتے ہوئے کہا کہ پہلی بار ایک سال میں مسئلہ کشمیر کو بھرپور طریقے سے اجاگر کیا گیا، پچھلے 70 سال میں کبھی مسئلہ کشمیر کو اس طرح اجاگر نہیں کیا گیا۔
مراد سعید کا کہنا تھا کہ حقیقت میں بھارت دہشت گرد اور مودی نئے دور کا ہٹلر ہے، نریندر مودی آر ایس ایس کے نظریے کو مسلط کرنا چاہتا ہے۔ عمران خان نے وزیر اعظم بنتے ہی پہلی تقریر میں کشمیریوں سے یکجہتی کا اظہار کیا۔ مسئلہ کشمیر پر 2 ایٹمی طاقتیں ٹکرا سکتی ہیں دنیا کو خبردار کرنا چاہتا ہوں۔
انہوں نے کہا کہ وزیر اعظم عمران خان نے کہا کہ غلامی کے لیے نہیں آزادی کے لیے لڑیں گے، ہم کشتیاں جلا چکے ہیں، کشمیر کو آزاد کروا کر رہیں گے۔ اقوام متحدہ کی سیکیورٹی کونسل میں 3 بار مسئلہ کشمیر پر بحث ہونا پاکستانی کی کامیابی ہے۔
مراد سعید کا کہنا تھا کہ اب بھارت کے اندر سے بھی آواز آتی ہے کہ کشمیر اندرونی مسئلہ نہیں ہے، سیاست اور سوچ ایک دوسرے سے الگ مگر کشمیر پر سب کو متحد ہونا ہوگا۔ وزیر اعظم عمران خان نے دنیا کو کشمیریوں کا سفیر بن کر دکھایا۔
انہوں نے کہا کہ حریت رہنماؤں نے وزیر اعظم کو خط لکھا اور خراج تحسین پیش کیا، ایک برہان وانی نے پورے بھارت کو ہلا کر رکھ دیا تھا۔ ایک برہان وانی کی شہادت کے بعد لاکھوں برہان وانی اور پیدا ہو گئے ہیں۔
مراد سعید کا کہنا تھا کہ وزیر اعظم کل آزاد کشمیر قانون ساز اسمبلی سے خطاب کریں گے، کشمیر کاز پر کل آزاد کشمیر میں بہت بڑا جلسہ ہوگا۔ کل کشمیر کے شہدا کو خراج عقیدت پیش کیا جائے گا۔
