لاہور: قومی کرکٹ ٹیم کے ہیڈ کوچ اور چیف سلیکٹر مصباح الحق نے کہا ہے کہ قومی ٹیم کی کارکردگی سے مطمئن ہیں، سمجھتے ہیں ابھی مزید کام کرنے کی ضرورت ہے۔
تفصیلات کے مطابق پاکستان کرکٹ بورڈ کے بورڈ آف گورنرز کا 57واں اجلاس ہوا جس میں مصباح الحق کی حمایت کی گئی، بورڈ آف گورنرز کے ارکان کا کہنا تھا کہ قومی ٹیم موجودہ مینجمنٹ کی زیر نگرانی مستقبل میں بہتر نتائج دے گی۔
ہیڈ کوچ مصباح الحق کا کہنا تھا کہ 5 ماہ میں قومی کرکٹ ٹیم کے کھلاڑیوں کی فٹنس میں بہتری آئی ہے، کھلاڑیوں کے اعتماد میں اضافہ اور کارکردگی بہتر ہورہی ہے۔
مصباح الحق کا کہنا تھا کہ بی او جی اراکین سے طویل تبادلہ خیال مثبت اور معاون بیٹھک تھی۔
مزید پڑھیں: ٹیم کو سینئرز کی ضرورت ہے، مصباح الحق کا اعتراف
بورڈ آف گورنرز کے اجلاس میں مستقبل سے متعلق چند مثبت تجاویز بھی پیش کی گئیں، بی او جی نے بیرسٹر سلمان نصیر کی بطور چیف آپریٹنگ آفیسر تعیناتی کی منظوری دی۔
واضح رہے کہ اس سے قبل مصباح الحق کا کہنا تھا کہ شعیب ملک اور حفیظ کا کیریئر ختم نہیں ہوا، جب تک کوئی کھلاڑی فٹ، فارم میں ہو کھلانا چاہئے۔
ان کا کہنا تھا کہ ملک اور حفیظ کا تجربہ ٹیم کے کام آرہا ہے، نوجوان کھلاڑیوں کے لیے اسپنرز کو کھیلنے میں مشکل ہوئی، آج موسیٰ، عماد بٹ اور عثمان قادر کو کھلانے کا پلان تھا۔
ہیڈ کوچ کا کہنا تھا کہ پی ایس ایل کے بعد دو ماہ کا وقت ہوگا جب کارکردگی کا جائزہ لیں گے۔
