مظفر آباد: وزیر اعظم عمران خان نے آل پارٹیز حریت کانفرنس کے وفد سے ملاقات کے دوران کہا کہ مظلوم کشمیریوں کی آوازیں عالمی ضمیر کو جھنجھوڑ رہی ہیں، پاکستان ہر محاذ پر کشمیریوں کی حمایت جاری رکھے گا۔
تفصیلات کے مطابق وزیر اعظم عمران خان سے آل پارٹیز حریت کانفرنس کے وفد کی ملاقات ہوئی، وفد کی قیادت سید عبد اللہ گیلانی اور سید فیض نقشبندی نے کی۔
وفد نے مسئلہ کشمیر اجاگر کرنے پر وزیر اعظم عمران خان کو خراج تحسین پیش کیا جبکہ مسئلہ کشمیر مزید اجاگر کرنے کے لیے وزیر اعظم عمران خان کو تجاویز بھی پیش کی گئیں۔
وزیرِ اعظم عمران خان سے سید عبداللہ گیلانی اور سید فیض نقشبندی کی قیادت میں آل پارٹیز حریت کانفرنس کے وفد کی مظفرآباد میں ملاقات
وفد میں عبدالمجید ملک، سید اعجاز رحمانی، شیخ محمد یعقوب ، عبدالمجید میر ، شیخ عبدالمتین اور جاوید اقبال بٹ شامل#StandWithKashmir pic.twitter.com/tkxErUrIbD
— PTI (@PTIofficial) February 5, 2020
اس موقع پر وزیر اعظم عمران خان کا کہنا تھا کہ 9 لاکھ قابض افواج اور ریاستی جبر سے کشمیریوں کی آواز کو دبایا نہیں جا سکتا، آر ایس ایس فلسفے پر عمل پیرا بھارتی سرکار کا چہرہ بے نقاب ہوچکا۔
وزیر اعظم کا کہنا تھا کہ ہر سطح اور ہر فورم پرکشمیریوں کی آواز بلند کرتا رہوں گا، مظلوم کشمیریوں کی آوازیں عالمی ضمیر کو جھنجھوڑ رہی ہیں۔ پاکستان ہر محاذ پر کشمیریوں کی حمایت جاری رکھے گا۔
اس سے قبل آزاد کشمیر کی قانون ساز اسمبلی سے خطاب کرتے ہوئے وزیر اعظم عمران خان نے کہا کہ مودی بھارت کو جس مقام پر لے گیا ہے وہ یہاں سے باہر نہیں جا سکتا، اب مودی کو بھارت کے اندر بڑی مزاحمت کا سامنا ہوگا۔
انہوں نے کہا تھا کہ یہ وہ وقت ہے کہ کشمیر آزادی کی طرف بڑھے گا، میں یقین دلاتا ہوں ہر فورم پر مسئلہ کشمیر کو اور تیزی سے اٹھائیں گے۔
