اسلام آباد : وزارت داخلہ کا کہنا ہے کہ بغیر پاسپورٹ زائرین کو کرتارپور آنےکی اجازت کی ایک تجویز زیر غور ہے، اس تجویز پر وزارت خارجہ سے مفصل رائے لی جائے گی۔
تفصیلات کے مطابق وزارت داخلہ نے قومی اسمبلی کے اجلاس میں کرتارپور آنے والے بھارتی زائرین سے متعلق تحریری جواب کرایا ، جس میں بتایا گیا بھارتی زائرین کو بغیر پاسپورٹ کرتارپور آنے کی اجازت نہیں ، بغیر پاسپورٹ زائرین کو آنے کی اجازت کی ایک تجویز زیر غور ہے، اس تجویز پر وزارت خارجہ سے مفصل رائے لی جائے گی۔
وزارت داخلہ نے بتایا بھارتی زائرین پاسپورٹ دکھاکرصبح سے شام تک راہداری کادورہ کرسکتےہیں، سیکورٹی نظام کے تحت زائرین کےآنےجانےکی نقل و حرکت کی نگرانی ہوتی ہے۔
تحریری جواب میں مزید کہا گیا بھارتی زائرین کو پاکستان کی طرف نہ جانےکویقینی بنایاجاتاہے، کیمروں کی نگرانی کے ذریعے راہداری کی سرگرمیوں کی نگرانی ہوتی ہے۔
خیال رہے گذشتہ سال9 نومبر کو وزیر اعظم عمران خان نے کرتارپور راہداری کا افتتاح کیا تھا ، تقریب سے خطاب کرتے ہوئے کہا تھا کہ راہداری کھولنے کی مجھے بہت خوشی ہوئی، اندازہ نہیں تھا کرتارپورکی سکھ کمیونٹی میں کیا اہمیت تھی، کرتارپور سے متعلق ایک سال پہلے پتہ چلا اس کی کیا اہمیت ہے۔
امریکی محکمہ خارجہ، اقوام متحدہ اورعالمی میڈیا کی جانب سے کرتارپور راہداری کھولنے کا خیرمقدم کیا گیا تھا۔
