لاہور : کرکٹ اور ٹینس کے بعد پاکستان میں کبڈی کے عالمی کپ کا میلہ کل سے سجے گا، میگا ایونٹ میں حصہ لینے کیلئے بھارتی ٹیم بھی پاکستان پہنچ گئی، مقابلے لاہور، فیصل آباد اور گجرات میں ہوں گے۔
تفصیلات کے مطابق کرکٹ اور ٹینس کے بعد کبڈی ورلڈ کپ کا آغاز کل سے پاکستان میں ہوگا، ایونٹ میں پاکستان سمیت دس ممالک کے پہلوان شرکت کریں گے۔
جرمنی ،ایران اور آذربائیجان کے بعد بھارت کی کبڈی ٹیمیں بھی پاکستان پہنچ گئیں، بھارتی ٹیم واہگہ بارڈر کے راستے لاہور پہنچی، اس موقع پر بھارتی کبڈی ٹیم کے کپتان نے میڈیا سے گفتگو کرتے ہوئے کہا کہ پاکستان میں بہت عزت مل رہی ہے یہاں سے خوشگوار یادیں لے کر جائیں گے۔
کبڈی کے عالمی کپ کا آغاز کل سے ہوگا۔ میچز لاہور،گجرات اورفیصل آباد میں شیڈول ہیں، پہلے میچ میں میزبان پاکستان کا کینڈا سے مقابلہ ہوگا۔
اس حوالے سے شائقین پرجوش ہیں، ٹکٹوں کی فروخت کا زور شور سے سلسلہ جاری ہے۔ پنجاب اسپورٹس منسٹر رائے تیمور کہتے ہیں کہ ایونٹ کے تمام انتظامات مکمل ہیں،عالمی کپ کا تاریخی انعقاد کرکے اس کو تاریخی بنائیں گے۔
مزید پڑھیں : کبڈی ورلڈ کپ کی میزبانی پاکستان کو مل گئی
واضح رہے کہ کبڈی ورلڈ کپ کی فاتح ٹیم کو ایک کروڑ روپے، رنر اپ 75 لاکھ اور تیسرے نمبر پر آنے والی ٹیم کو 50 لاکھ روپے انعام دیا جائے گا۔
