اسلام آباد: وفاقی وزیر مواصلات مراد سعید نے چیئرمین پیپلزپارٹی بلاول بھٹو کو چیلنج دیتے ہوئے کہا کہ حلقہ منتخب کریں میں الیکشن لڑوں گا۔
تفصیلات کے مطابق وفاقی وزیر مراد سعید نے قومی اسمبلی میں اظہار خیال کرتے ہوئے کہا کہ جب بھی ایوان میں آتا ہوں اپوزیشن کی کوشش ہوتی ہے مجھےموقع نہ ملے، جب مجھےموقع ملتا ہے تو یہ بیان دے کرفوری بھاگنے کی کوشش کرتے ہیں۔
انہوں نے کہا کہ ہم نے حکومت سنبھالی تو تمام ادارے دیوالیہ کے قریب تھے، اپوزیشن نے تمام عمارتوں کوگروی رکھا ہوا تھا، ہم نے حکومت سنبھالی تو 24 ہزار ارب قرضہ، پورا ملک گروی رکھا ہوا تھا۔
مراد سعید کا کہنا تھا کہ وصیت اور پرچی لے کرسیاست میں آنے والے سلیکٹڈ کی بات کرتے ہیں، پرچی لہرا کر سیاست میں آتے ہیں اور ہمارے قائد پر تنقید کرتے ہیں۔
وفاقی وزیر نے کہا کہ صحت انصاف کارڈ کا رخ سندھ کی طرف کیا تو پی پی نے اسے کیوں روکا، سندھ حکومت نے کہا ہمیں صحت انصاف کارڈ کے نام پر اعتراض ہے، سندھ حکومت کہتی ہے صحت انصاف کارڈ کانام تبدیل کر کے بی بی کے نام سے رکھنا ہے۔
مراد سعید نے چیئرمین پیپلزپارٹی بلاول بھٹو کو چیلنج دیتے ہوئے کہا کہ حلقہ منتخب کریں میں الیکشن لڑوں گا۔انہوں نے کہا کہ ابھی میں اپنی پچ پر کھیل رہا ہوں، پرچی لے کر اسمبلی میں نہیں آیا، درست احتساب ہو تو بلاول بھٹو کو اپنی آکسفورڈکی فیس بھی واپس کرنا ہوگی۔
وفاقی وزیر کا مزید کہنا تھا کہ اللہ کی شان ہے آج زرداری کا بیٹا ہمیں باتیں سنا رہا ہے، آئندہ اگر ہمارے وزیراعظم کے خلاف بات کی تو بلاول کو قومی اسمبلی میں بات نہیں کرنے دوں گا۔
