ام القوین:متحدہ عرب امارات میں ہائی وے پر مخالف سمت میں تیز رفتار گاڑی چلانے والے ڈرائیور کو گرفتار کر لیا گیا۔
خلیجی میڈیا رپورٹ کے مطابق منچلے کو ہائی وے پر کرتب دکھانا مہنگا پڑ گیا، ریاست ام القوین میں پولیس نے لاپرواہی اور لوگوں کی زندگیاں خطرے میں ڈالنے والے کار ڈرائیور کو گرفتار کر لیا۔
پولیس کو سوشل میڈیا پر وائرل ہونے والی ایک ویڈیو موصول ہوئی جس میں ایک لاپرواہ ڈرائیور ہائی وے پر تیز رفتاری سے رانگ وے گاڑی چلا رہا تھا، یہ منظر دیکھ کر ہائی وے پر سفر کرنے والے دنگ رہ گئے اور خوف کے مارے چیخ و پکار کرنے لگے۔
#UAE man arrested for driving on wrong side of highway pic.twitter.com/KyUANcUq4r
— Anees Hanif (@anees_avis) February 14, 2020
یہ ویڈیو ہائی وے پر ایک مسافر کی جانب سے بنائی گئی جس میں دیکھا جاسکتا ہے کہ کار سوار شخص مخالف سمت میں تیز رفتاری سے گاڑیوں کے بیچ سے گزر رہا ہے، یہ سڑک التحاد سے شارجہ کی جانب الحمریہ کے علاقے جاتی ہے۔
ویڈیو میں گاڑی کی نمبر پلیٹ اور ڈرائیور کا چہرہ صاف واضح تھا، پولیس نے فوری طور پر کارروائی کرتے ہوئے ملزم کو گرفتار کر کے گاڑی ضبط کر لی اور اس کے خلاف مزید تفتیش شروع کردی گئی ہے۔