ریاض : سعودی محکمہ ٹریفک نے نجی گاڑیوں کے ڈرائیونگ لائسنس حاصل کرنے کے لیے نئی شرائط جاری کردیں، جس کے تحت ڈرائیور کا جسمانی اور ذہنی طور پر مکمل صحت مند ہونا لازمی ہے۔
تفصیلات کے مطابق سعودی محکمہ ٹریفک نے نجی گاڑیوں کے ڈرائیونگ لائسنس حاصل کرنے والوں کے لیے شرائط نامہ جاری کیا ہے، نجی گاڑیوں کے ڈرائیونگ لائسنس حاصل کرنے کی ایک بنیادی شرط یہ ہے کہ امیدوار جسمانی معذوری اور ذہنی امراض سے پاک ہو۔
سماجی رابطے کی ویب سائٹ ٹوئٹر پر ایک شہری نے سوال کیا کہ میں نے ماضی میں ٹریفک خلاف ورزی کی تھی اب میں ڈرائیونگ لائسنس جاری کرانا چاہتا ہوں کیا سابقہ خلاف ورزی کا جرمانہ ادا کرکے ڈرائیونگ لائسنس حاصل کرسکتا ہوں؟
جس پر ترجمان نے تفصیلی اور مرحلہ وار جواب دیتے ہوئے بتایا کہ اٹھارہ برس سے کم عمر کے امیدوار کو ڈرائیونگ لائسنس نہیں دیا جائے گا، ڈرائیونگ لائسنس کے لیے اٹھارہ برس کی عمر ضروری ہے۔
دوسری شرط یہ ہے کہ ڈرائیونگ لائسنس کے امیدوار کو عدالت نے نشہ آور اشیا کے استعمال یا دھندے یا ذخیرہ کرنے کا مجرم قرار نہ دیا ہو، تیسری اہم شرط یہ ہے کہ ڈرائیونگ لائسنس کا امیدوار ایسی بیماریوں اور معذوریوں سے پاک صاف ہو جو ڈرائیونگ میں رکاوٹ بنتی ہوں۔
چوتھی شرط ڈرائیونگ کا امتحان پاس کرنا ضروری ہے۔ پانچویں شرط یہ ہے کہ ٹریفک خلاف ورزیوں کے جرمانے ادا کرکے ہی درخواست دی جاسکتی ہے، غیر ملکیوں سے متعلق چھٹی شرط یہ ہے کہ ان کے پاس سعودی عرب میں قانونی قیام کی دستاویز (اقامہ) ہو۔
