جہلم: پنجاب کے شہر جہلم میں سوتیلے بیٹے نے جائیداد کی لالچ میں ماں اور 4 بہن بھائیوں کو قتل کردیا۔
اے آر وائی نیوز کے مطابق صوبہ پنجاب کے شہر جہلم میں بدبخت سوتیلے بیٹے نے جائیداد کی لالچ میں ماں اور 4 بہن بھائیوں کو قتل کردیا، ملزم صداقت واردات کے بعد فرار ہوگیا۔
پولیس کا کہنا ہے کہ مقتولین میرپور سے گھر آرہے تھے ملزم صداقت نے بڈھار کے مقام پر فائرنگ کرکے پانچوں افراد کو قتل کیا۔
نمائندہ اے آر وائی نیوز کے مطابق ماں بیٹوں کی لاشوں کو ضابطے کی کارروائی کے لیے ڈسٹرکٹ ہیڈ کوارٹر اسپتال منتقل کردیا گیا ہے۔
جاں بحق بچوں کے والد کا کہنا ہے کہ میرے خاندان کو میرے بیٹے نے مارا ہے اور قتل کرانے والا میرا چھوٹا بھائی، میرا بھتیجا،میری بڑی بیٹی ہے ان لوگوں نے قتل کرایا ہے۔
مزید پڑھیں: سفاک بیٹے نے ماں اور اپنے بھائی کو موت کے گھاٹ اتار دیا، باپ شدید زخمی
واضح رہے کہ نومبر 2018 میں لاہور میں سفاک بیٹے نے باپ کی قبر پر بلا کر سوتیلی ماں اور دو بہنوں کو فائرنگ کرکے قتل کردیا تھا، تیسری بہن بھاگ کر جان بچانے میں کامیاب ہوگئی تھی۔
پولیس کا کہنا تھا کہ ملک اصغر عرف بلو کو بھی چند دن پہلے قتل کردیا گیا تھا، اس کی دیگر دو بیویاں قتل کےالزام میں گرفتار ہیں، ملک اصغر عرف بلو علاقے کی سیاسی شخصیت تھا۔
پولیس کا کہنا تھا کہ ملک اصغر عرف بلو نے چھ شادیاں کر رکھی تھیں، تہرے قتل کی واردات بھی خاندانی جھگڑا اور جائیداد کی ملکیت کا شاخسانہ ہوسکتا ہے۔
