کراچی: اداکار یاسر حسین اور اپنی اہلیہ اداکارہ اقرا عزیز سے محبت کے اظہار کا انوکھا انداز ایک بار سوشل میڈیا پر وائرل ہوگیا۔
تفصیلات کے مطابق اداکار و میزبان یاسر حسین اور ان کی اہلیہ اقرا عزیز دونوں ہی سماجی رابطے کی ویب سائٹ انسٹاگرام پر کافی متحرک رہتے ہیں اور اپنے پل پل کی سرگرمیوں سے مداحوں کو آگاہ کرتے رہتے ہیں۔
چند روز قبل ہی نامور اداکارہ سعدیہ اور اداکار حسن کی شادی میں شرکت کے دوران اقرا عزیز اور یاسر حسین نے ہلہ گلہ کیا تھا جس کی ویڈیو اور تصاویر سوشل میڈیا کی زینت بنی تھیں۔
گزشتہ روز یاسر حسین نے ایک اور محبت کے اظہار کا منفرد انداز اپناتے ہوئے اپنے بازو پر نام ’اقرا‘ کندوا لیا جس کی ویڈیو اور تصاویر سوشل میڈیا پر وائرل ہوگئی۔
سب ہی جانتے ہیں کہ یاسر حسین ٹیٹو بنوانے کے بے حد شوقین ہیں لیکن اس بار انہوں نے اپنی اہلیہ کا نام کندوالیا، یاسر کا کہنا تھا کہ مجھے اپنے جیون ساتھی اقرا سے بے حد پیار ہے اور ٹیٹو لفظ اقرا کی خطاطی بھی نہایت دلکش ہے۔
یاد رہے کہ اداکارہ اقرا عزیز اور یاسر حسین گزشتہ برس 28 دسمبر کو رشتہ ازدواج میں منسلک ہوئے تھے اور یاسر نے اقرا کو ایوارڈ شو کے دوران پروپوز کیا تھا۔
خیال رہے کہ اقرا عزیز نے چند ہی ڈراموں سے بہت جلد اداکاری میں اپنا لوہا منوایا جبکہ ان کے مداحوں کی تعداد بھی دن بدن بڑھتی جارہی ہے۔
