دبئی: متحدہ عرب امارات کی ریاست کے ولی عہد اور دبئی کی ایگزیکٹیو کونسل کے چیئرمین شیخ ہمدان نے کینسر سے متاثرہ 7 سالہ بچے سے ملاقات کر کے اُس کی دیرینہ خواہش پوری کردی۔
گلف نیوز کی رپورٹ کے مطابق کینسر سے متاثر ہونے والے عبداللہ حسین کا تعلق بھارت کے شہر حیدر آباد سے ہے اور اُسے کینسر کی تشخیص ہوئی جو تیسرے مرحلے (تھرڈ اسٹیج) پر ہے۔
عبداللہ کی خواہش تھی کہ شیخ ہمدان بن محمد بن راشد المکتوم اُس سے ملاقات کریں، بچے نے اپنی ویڈیو بنا کر سوشل میڈیا پر بھی شیئر کی جسے دیکھ کر دبئی کے شہزادے نے ملاقات کا فیصلہ کیا۔
سوشل میڈیا پر جو ویڈیو شیئر ہوئی اُس میں عبداللہ کا کہنا تھا کہ ’شیخ ہمدان بہت اچھے انشان ہیں، میں اُن سے ملنا اور انہیں دیکھنا چاہتا ہوں‘۔
Watch | A seven-year old’ wish to meet the Crown Prince of #Dubai
Abdullah Hussain from Hyderabad is suffering from third stage cancer and wants to meet his role model, @HamdanMohammed pic.twitter.com/Ll3W4OaYFt
— WION (@WIONews) March 2, 2020
’شیخ ہمدان میں آپ سے بہت محبت کرتا ہوں اور آپ کا بہت بڑا مداح ہوں، میری خواہش ہے کہ آپ سے جلد ملاقات ہو‘۔
جمعے کے روز دبئی کی ایگزیکیٹو کونسل کے چیئرمین شیخ ہمدان عبداللہ اپنے بھائی کے ہمراہ عبداللہ سے ملاقات کے لیے اسپتال پہنچے اور اُس کی خیریت بھی دریافت کی۔
عبداللہ نے شیخ ہمدان کو بتایا کہ وہ انہیں اپنا آئیڈیل مانتا ہے۔
بعد ازاں شیخ ہمدان نے سوشل میڈیا اکاؤنٹ پر ملاقات کی تصویر شیئر کرتے ہوئے لکھا کہ ’آج میری باہمت بچے سے ملاقات ہوئی‘۔
