کراچی : محکمہ اینٹی کرپشن نے سندھ ہاؤس اسلام آباد اسٹاف کالونی میں ہونے والی مبینہ میگا کرپشن کی تحقیقات کا آغاز کردیا، صوبائی بلڈنگ ڈویژن ورکس کراچی کے افسران نے جعلی بلز سے رقم ہڑپ کی۔
تفصیلات کے مطابق سندھ ہاؤس اسلام آباد میں ہونے والی مبینہ میگا کرپشن کی تحقیقات شروع کردی گئی ہیں، محکمہ اینٹی کرپشن سندھ نے مبینہ کرپشن کی تحقیقات کیلئے ضروری اقداامت کرلیے۔
اس حوالے سے ذرائع کا کہنا ہے کہ سندھ ہاؤس اسلام آباد اسٹاف کالونی کے ترقیاتی کاموں کیلئے مختص فنڈز میں گھپلوں کا انکشاف ہوا تھا، ترقیاتی کاموں کیلئے 13کروڑ 82لاکھ روپے سے زائد رقم جاری کی گئی تھی۔
ذرائع کے مطابق صوبائی بلڈنگ ڈویژن ورکس کراچی کے افسران نے جعلی بلز سے بھاری رقم ہڑپ کی، اس سلسلے میں چیف انجینئر اخترعلی، سپرٹینڈنٹ انجنئیر ارشد علی اور محمد عاقل کے خلاف تحقیقات شروع کردی گئی ہیں، اختر چوہدری، طارق آزاد اور دیگر افسران کے خلاف بھی تحقیقات کا آغاز کردیا گیا ہے۔
صوبائی وزیر برائے انسداد بدعنوانی جام اکرام اللہ دھاریجو نے کہا ہے کہ کرپشن میں ملوث افسر کو کسی صورت نہیں بخشا جائے گا، ہماری پوری کوشش ہے کہ معاشرے کو کرپشن سے پاک کیا جائے، کرپشن سے متعلق تمام کیسز کو منطقی انجام تک پہنچائیں گے۔