سڈنی: امریکی صدر کی صاحبزادی ایوانکا ٹرمپ سے ملاقات کے بعد آسٹریلوی وزیر کرونا وائرس میں مبتلا ہوگئے۔
غیرملکی خبررساں ادارے کی رپورٹ کے مطابق آسٹریلیا کے سینئر سیاست دان پیٹر ڈوٹن ایوانکا ٹرمپ اور امریکی اٹارنی جنرل ولیم بر سے ملاقات کے بعد کرونا وائرس مبتلا ہوگئے۔
آسٹریلوی وزیر پیٹر ڈوٹن نے گزشتہ ہفتے امریکا میں منعقدہ اجلاس میں شرکت کی تھی جس میں آسٹریلیا، امریکا، برطانیہ، کینیڈا اور نیوزی لینڈ کے حکام شریک ہوئے تھے۔
رپورٹ کے مطابق پیٹر ڈوٹن نے ایوانکا ٹرمپ سے 6 مارچ کو ملاقات کی تھی جس کی تصاویر بھی آسٹریلوی سفارت خانے کی جانب سے شیئر کی گئی ہیں۔
آسٹریلوی وزیر پیٹر ڈوٹن کو قرنطینہ منتقل کردیا گیا ہے جہاں انہیں طبی امداد کی فراہمی جاری ہے۔
پیٹر ڈوٹن کا کہنا تھا کہ آج صبح جب میں سو کر اٹھا تو بخار اور گلے میں درد کی شکایت ہوئی جب ٹیسٹ کرایا گیا تو اس کی رپورٹ مثبت آئی۔
مزید پڑھیں: ٹرمپ سے ملاقات کے بعد غیرملکی عہدیدار میں کروناوائرس کی تصدیق
ڈوٹن کا کہنا تھا کہ وہ ٹھیک محسوس کررہے ہیں لیکن ان کی تشخیص سے یہ خدشات پیدا ہوگئے ہیں کہ کیا کابینہ کے دیگر ممبران اور وزیراعظم اسکاٹ موریسن بھی متاثر ہوسکتے ہیں۔
واضح رہے کہ گزشتہ روز برازیلین عہدیدار فیبیو ونگرٹرن میں کرونا وائرس میں مبتلا ہوگئے تھے، انہوں نے 7 مارچ کو امریکی ریاست فلوریڈا میں ڈونلڈ ٹرمپ سے ملاقات کی تھی۔
