ریاض : سعودی حکومت نے مملکت کے تمام بڑے ائیرپورٹس بین الاقوامی پروازیں دو ہفتےکیلئے بند کرنے کا اعلان کردیا، یہ پابندی سعودی وقت کے مطابق آج صبح 11 بجے سے لاگو ہوگئی۔
تفصیلات کے مطابق سعودی عرب کی جنرل اتھارٹی آف سول ایوی ایشن اتھارٹی نے کورونا وائرس کی روک تھام اور احتیاطی تدابیر اختیار کرتے ہوئے فیصلہ کیا ہے کہ بین الاقوامی فلائٹ آپریشن دو ہفتوں کے لیے معطل کردیا جائے۔
اس بات کا اعلان باضابطہ طور پر بھی کردیا گیا ہے، ملک بھر کے تمام ائیرپورٹ سعودی وقت کے مطابق صبح گیارہ بجے کے بعد انٹرنیشنل فلائٹس کیلئے بند کردیئے گئے ہیں۔
گا کا کے مطابق بیرون ملک سے آنے والی تمام پروازوں پر سعودی عرب آنے پر پابندی ہوگی، سعودی ایوی ایشن کے مطابق تمام ائیر پورٹ بین الاقوامی پروازوں کے لئے دو ہفتے کے لئے بند کئے گئے ہیں
ائیرپورٹ کے بین الاقوامی پروازوں کیلئے بند ہونے سے متعلق باضابطہ نوٹم بھی جاری کردیا گیا ہے، نوٹم کی کاپی اے آر وائی نیوز کو موصول ہوگئی ہے۔
واضح رہے کہ سعودی عرب کی جانب سے اقاما ہولڈروں کو سعودی عرب آنے کیلئے 72 گھنٹے کی ڈیڈلائن دی گئی تھی، تاہم سعودی حکومت کے جاری مراسلہ میں کہا گیا ہے کہ فلائٹ آپریشن کی معطلی کے باعث سعودی عرب نہ پہنچنے والے تمام
سعودی اور غیر ملکی شہریوں کی غیر حاضری کو غیر معمولی سرکاری چھٹیوں میں شمار کیا جائے گا۔ سی اے اے اور پی آئی اے نے گاکا کو فلائٹ آپریشن کو 25 مارچ تک توسیع کی درخواست کی تھی جو مسترد ہو گئی۔
