گلگت: ایران سے واپس آنے والے 179زائرین گلگت بلتستان کے علاقے جگلوٹ پہنچ گئے۔
تفصیلات کے مطابق ایران سے گلگت پہنچنے والے زائرین کی جگلوٹ اسکریننگ سینٹر میں اسکریننگ کا عمل جاری ہے۔ واپس آنے والے زائرین 6 بسوں کے ذریعے جگلوٹ پہنچے ہیں۔
کرونا اسکریننگ کیمپ کے اطراف پولیس کی بھاری نفری تعینات کردی گئی۔ اسکریننگ کیمپ ایریا میں جراثیم سے بچاؤ کے لیے سخت احتیاطی تدابیر اختیار کی جارہی ہیں۔
دو روز قبل ایران سے آنے والے زائرین کو بلوچستان کے سرحدی علاقے تفتان بارڈر سے لے کر مزید 4 بسیں سکھر کی لیبر کالونی پہنچیں جن میں درجنوں مسافر سوار تھے، زائرین میں بچے اور عورتیں بھی شامل ہیں۔
کرونا وائرس: تفتان سرحد سے مزید زائرین سکھر پہنچ گئے
انتظامیہ کا کہنا ہے کہ زائرین کو لیبر کالونی میں قائم آئسولیشن یونٹ میں 14 روز کے لیے قرنطینہ میں رکھا جائے گا اور اسکریننگ بھی کی جائے گی اس دوران انہیں کسی سے ملنے پر پابندی ہوگی۔
واضح رہے کہ پاک ایران ‘‘تفتان سرحد‘‘ پر ابھی بھی درجنوں زائرین موجود ہیں۔ جبکہ متعدد زائرین کی ایران میں موجودگی کی بھی اطلاعات ہیں۔ بلوچستان حکومت تمام زائرین کو ان کے صوبوں تک پہنچانے کے لیے ہرممکن اقدامات کررہی ہے۔
