اسلام آباد: وزیراعظم عمران خان کا کہنا ہے کہ انشا اللہ پاکستان کرونا وائرس کے خلاف جنگ جیتے گا اور پاکستانی بطور قوم متحد ہو کر وائرس کو شکست دیں گے، کرونا سے ڈرنے کی نہیں صرف احتیاط کی ضرورت ہے۔
تفصیلات کے مطابق وزیراعظم عمران خان سے سابق وزیر قانون بابر اعوان کی ملاقات ہوئی ، ملاقات میں ملکی صورت حال سمیت آئینی اور قانونی امور پر تبادلہ خیال کیا گیا اور کرونا وائرس صورتحال اور قابو پانے کے حوالے سے اقدامات پر بات چیت کی گئی۔
وزیر اعظم عمران خان نے کہا کہ انشا اللہ پاکستان کرونا وائرس کے خلاف جنگ جیتے گا، کرونا وائرس پر کنٹرول کےحوالے سے چین کاتعاون قابل ستائش ہے، چین کی کرونا کی روک تھام کے لیےمعاونت فراموش نہیں کر سکتے۔
عمران خان کا کہنا تھا کہ پاکستانی بطور قوم متحد ہو کر وائرس کو شکست دیں گے، کرونا سے ڈرنےکی نہیں صرف احتیاط کی ضرورت ہے، وائرس کےاثرات کے تناظر میں عالمی اداروں کواعتماد میں لیا جا رہا ہے۔
انھوں نے کہا کہ کرونا کے حوالے سے تمام اقدامات کی خود نگرانی کر رہا ہوں، عوام کوریلیف پہنچانے کے تمام وسائل کو برؤے کار لایا جائے گا۔
اس موقع پر بابر اعوان کا کہنا تھا کہ کرونا کے حوالے سے وزیراعظم کا قائدانہ کردار قابل تعریف ہے، بر وقت حکومتی اقدامات بھی قابل ستائش ہیں، قوم کو وزیر اعظم عمران خان کی قیادت پر فخر ہے۔
وزیراعظم نے بابر اعوان کی مرحوم والدہ کے لیےفاتحہ خوانی کی اور کہا ماں جیسےعظیم رشتے کے کھو جانے کے نقصان کامجھے اندازہ ہے۔
