عارف والا: پنجاب کے ضلع پاکپتن کی تحصیل عارف والا میں بارش کے باعث گھر کی چھت گرنے سے 4 افراد جاں بحق ہو گئے۔
تفصیلات کے مطابق عارف والا کے ایک نواحی گاؤں میں بارش کے باعث ایک محنت کش کے گھر کی بوسیدہ چھت گر گئی، جس کے ملبے تلے دب کر گھر کے چار افراد جاں بحق جب کہ 3 زخمی ہو گئے۔
اسپتال ذرایع کے مطابق جاں بحق ہونے والوں میں باپ، 2 بیٹے اور ایک بیٹی شامل ہیں۔ محنت کش ارشاد اپنے اہل خانہ کے ہمراہ گھر میں سویا ہوا تھا کہ سانحہ پیش آیا۔
ادھر پنجاب کے مختلف شہروں میں ہلکی اور تیز بارش کا سلسلہ جاری ہے، فیصل آباد، گجرات، اوکاڑہ میں بارش سے موسم خوش گوار ہو چکا ہے، ڈسکہ، پھول نگر، کوٹ رادھا کشن، پنڈی بھٹیاں، شاہ کوٹ میں بھی بارش ہوئی۔
گوجرانوالہ میں گھر کی بوسیدہ چھت گرنے سے 3 بچے جاں بحق
لاہور میں بھی وقفے وقفے سے ہلکی اور تیز بارش کا سلسلہ جاری ہے، بارش سے درجہ حرارت میں کمی ہو گئی ہے اور موسم خوش گوار ہو گیا ہے، شہر میں اب تک 5 ملی میٹر بارش ریکارڈ کی گئی ہے، محکمہ موسمیات کا کہنا ہے کہ ایئر پورٹ اور اطراف میں 6 ملی میٹر بارش ریکارڈ کی گئی، آیندہ 24 گھنٹوں میں بارش کا سلسلہ وقفے وقفے سے جاری رہے گا۔
موسمیات کے مطابق لاہور میں آج دن بھر مطلع ابر آلود رہے گا، لاہور میں ہوا میں نمی کا تناسب 85 فی صد، رفتار 7 کلو میٹر ریکارڈ کی گئی، زیادہ سے زیادہ درجہ حرارت 23 ڈگری سینٹی گریڈ ریکارڈ کیے جانے کا امکان ہے۔
