جدہ : خود کشی کے ارادے سے سائن بورڈ پر چڑھنے والے افریقی باشندے کو شہری دفاع کے اہلکاروں نے بحفاظت زمین پر اتار لیا۔
تفصیلات کے مطابق جدہ کے علاقے الاندلس میں حالات سے پریشان ایک افریقی باشندہ خودکشی کی نیت سے ایکی اونچے سائن بورڈ پر چڑھ گیا۔
اس دوران سعودی محکمہ شہری دفاع کو ہنگامی سینٹر911 سے اطلاع موصول ہوئی کہ ایک شخص خود کشی کرنے کے ارادے سے 12میٹر بلند سائن بورڈ پر چڑھا ہوا ہے۔
شہری دفاع کے اہلکار فوری طور پر جائے وقوعہ پہنچے اور سائن بورڈ پر چڑھنے والے افریقی باشندے کو اس عمل سے باز رکھنے کی ہرممکن کوشش کی ۔
فوری کارروائی کرتے ہوئے شہری دفاع کے اہلکاروں نے احتیاطی طور پر بورڈ کے نیچے ہوائی گدا بھی بچھا دیا تاکہ اس شخص کی جانب سے انتہائی اقدام کی صورت میں کوئی سانحہ رونما نہ ہو۔
سعودی ذرائع ابلاغ کے مطابق شہری دفاع کے اہلکار خودکشی کے ارادے سے سائن بورڈ پر چرھ جانے والے افریقی کو اس کے ارادے سے بازرکھنے میں کامیاب ہو گئے اور اسے حفاظت سے اسنارکل کے ذریعے نیچے اتار لیا گیا۔
