واشنگٹن: امریکا کی معروف گلوکارہ میڈونا نے کروناوائرس ویکسین کی تیاری کے لیے 10 لاکھ ڈالر عطیہ کردیا۔
غیرملکی خبررساں ادارے کی رپورٹ کے مطابق امریکی گلوکارہ نےکروناوائرس کی ویکسین کی تیاری کی مد میں ’’بل اینڈ میلنڈا گیٹس فاؤنڈیشن‘‘ میں ایک ملین ڈالر عطیہ کیا۔
مائیکروسافٹ کے بانی اور دنیا کے دوسرے امیرترین شخص بل گیٹس نے منصوبہ ظاہر کیا ہے کہ وہ کروناوائرس ویکسین کی تیاری کے لیے 7 مختلف ریسرچ لیب کو فنڈ فراہم کریں گے۔ ان کی مدد اور اس کارخیر میں اپنا حصہ ڈالنے کے لیے میڈونا نے بھی 1 ملین ڈالر عطیہ کردیا۔
سماجی رابطے کی ویب سائٹ انسٹاگرام پر گلوکارہ نے اپنی ویڈیو شیئر کی جس میں ان کا کہنا تھا کہ کروناوائرس کے باعث ہم انفرادی اور عالمی سطح پر ہنگامی صورت حال کا شکار ہیں، میں اس بات کو قبول کرتی ہوں کہ مجھے موجودہ ماحول کے تحت اپنی طرز زندگی کو تبدیل کرنے میں وقت لگا۔
کورونا ویکسین کی تیاری : بل گیٹس کا اہم اعلان
انہوں نے کہا میں کروناوائرس سے لڑنے کے لیے بل گیٹس فاؤنڈیشن میں اپنا حصہ ڈال رہی ہوں جس نے طبی مراکز کو مدد فراہم کرکے کروناوائرس ویکسین کی تیاری کا بیڑا اٹھایا ہے۔
خیال رہے کہ بل گیٹس کرونا وائرس کے خلاف تیار کی جانے والی 7 بہترین ویکسینز کیلئے فیکٹریوں کی تعمیر پر اربوں ڈالرز خرچ کریں گے۔ یہ امداد کرونا وائرس کے خلاف تیار کی جانے والی 7 بہترین ویکسینز کے لیے فیکٹریوں کی تعمیر پر خرچ کی جائے گی۔ یہ بات انہوں نے گزشتہ روز ایک ٹی وی شو میں گفتگو کرتے ہوئے کہی۔
