روم: اٹلی میں چوبیس گھنٹوں کے دوران کرونا سے 431 اموات ہوئیں جو گزشتہ تین ہفتوں کے دوران سب سے کم تعداد ہے۔
خبررساں ادارے کی رپورٹ کے مطابق اٹلی میں کرونا کی وبا تھمنے لگی ہے جس کی وجہ سے اب وہاں نئے کیسز تیزی سے رپورٹ نہیں ہورہے جبکہ صحت یاب افراد کی تعداد بھی تیزی سے بڑھ رہی ہے۔
ایک روز قبل اٹلی میں 619 ہلاکتیں رپورٹ ہوئی تھیں جس کے بعد مرنے والوں کی مجموعی تعداد 19 ہزار 899 تک پہنچ گئی تھی۔ رپورٹ کے مطابق اٹلی میں نئے کیسز کی تعداد کم ہوکر 4092 تک پہنچ گئی جبکہ ایک روز میں رپورٹ ہونے والے کیسز کی تعداد 4600 سے زائد تھی۔
رپورٹ کے مطابق اٹلی میں کرونا سے صحت یاب ہونے والے مریضوں کی تعداد اضافے کے بعد 34 ہزار سے زائد ہوگئی ہے۔ اٹلی کی حکومت کی جانب جاری ہونے والے اعداد و شمار کے مطابق آئی سی یو میں زیر علاج مریضوں کی تعداد 9ویں روز بھی کم رہی۔
اٹلی میں اس وقت متاثرہ افراد کی تعداد ایک لاکھ 56 ہزار ہے۔ دنیا بھر میں مجموعی صورت حال کی بات کی جائے تو متاثرہ ممالک میں امریکا سرفہرست ہے جہاں 5 لاکھ 37 ہزار سے زائد کیسز رپورٹ ہوئے، دوسرے نمبر پر اسپین جہاں 1 لاکھ 66 ہزار مریض سامنے آئے۔
