واشنگٹن: امریکا میں انسانی دانت والے کتے کی اصل حقیقت سامنے آگئی، سوشل میڈیا پر وائرل ہونے والی ویڈیو میں نظر آنے والے انسانوں جیسے دانت کتے کے نہیں بلکہ نقلی ہیں۔
غیرملکی خبررساں ادارے کی رپورٹ کے مطابق یہ عجیب وغریب واقعہ امریکی ریاست میچھی گان میں پیش آیا جہاں پالتو کتے نے اپنے مالک کے نقلی دانت خود پہن لیے جس کی ویڈیو نے سوشل میڈیا پر دھوم مچا دی۔
رپورٹ میں کہا گیا ہے کہ ’بین چھیمپبل‘ نامی شہری پیشے کے اعتبار سے ایک ماہر نفسیات ہے تاہم کروناوائرس کے پیش نظر اس نے سیلف آئسولیشن اختیار کررکھی ہے اس دوران کتا بھی اس کے ساتھ ساتھ ہے۔
مذکورہ شہری سوشل میڈیا پر مزاحیہ ویڈیوز بھی بناتا ہے، اسی ضمن میں اس نے نقلی دانت خریدے تھے تاکہ حیرت انگیز اور مزاح سے بھرپور ویڈیو بنا کر اپنے مداح کو خوش کریں لیکن اس سے پہلے یہ کام کتے نے کردیا۔
’تھومس‘ نامی کتے نے نقلی دانت نہ صرف چرائے بلکہ پکڑے جانے پر فرار ہونے کی بھی کوشش کی۔ کتے کی اس حرکت پر مالک بھی حیران رہ گیا۔ اس نے مسکراتے ہوئے کتے سے سوال کیا ’یہ تم کیا کررہے ہو؟‘
