کراچی : پنجاب کے بعد سندھ حکومت نے کورونا کے پیش نظر رمضان بچت بازارنہ لگانے کا فیصلہ کرلیا اور کہا دکانوں،ا سٹالز پر پھلوں اور سبزیوں کی ترسیل یقینی بنائی جائے گی۔
تفصیلات کے مطابق سندھ حکومت نے کورونا کے پیش نظر رمضان بچت بازارنہ لگانے کا فیصلہ کیا ہے،وزیرزراعت سندھ اسماعیل راہو نے کہا کہ رمضان بچت بازارلگانے سےعوام کاہجوم بڑھ جائے گا، بچت بازار نہ لگانےکافیصلہ شہریوں کی حفاظت کےلئے کیاگیا ہے۔
اسماعیل راہو کا کہنا تھا کہ دکانوں،اسٹالزپرپھلوں،سبزیوں کی ترسیل یقینی بنائی جائے گی ، رمضان میں سرکاری نرخ پرآن لائن سبزی، پھل بھی منگوا سکتے ہیں۔
وزیرزراعت سندھ نے سبزی منڈیوں میں بھی مزید سختی کرنے اور ذخیرہ اندوزوں،منافع خوروں کے خلاف مجسٹریٹس کومتحرک رہنےکی ہدایت کرتے ہوئے کہا اسٹوروں،دکانوں،اسٹالزپرقیمتوں کی فہرستیں آویزاں کی جائیں گی۔
انھوں نے تمام ڈی سیز کو ضلعی سطح پر مانیٹرنگ سیل قائم کرنے کی ہدایت کرتے ہوئے کہا اشیائےخور ونوش مقررہ قیمت پرفروخت کی جائیں گی۔
گذشتہ روز وزیراعلیٰ پنجاب عثمان بزدار کی زیرصدارت اجلاس میں کرونا کے پیش نظر رمضان بازار نہ لگانے کا فیصلہ کرتے ہوئے رمضان میں عوام کو براہ راست ریلیف کی منظوری دی۔
وزیراعلیٰ پنجاب نے کہا تھا کہ عوام کو براہ راست کیش رقم ادا کی جائے گی۔سردار عثمان بزدار نے رقم کی شفاف تقسیم کا نظام وضع کرنے کی ہدایت کرتے ہوئے کہا کہ عوام کو ہر ممکن ریلیف دیا جائے گا۔
