فیصل آباد: پنجاب پولیس نے پانچ سالہ بچےسے زیادتی کیس میں گرفتار ملزمان کو چھڑانے کی کوشش کرنے والے 4 حملہ آوروں کو مقابلے میں ہلاک کردیا۔
نمائندہ اے آر وائی نیوز کے مطابق فیصل آباد پولیس نے کمسن بچے سے زیادتی کرنے والے 2 ملزمان کو حراست میں لیا تھا جو عدالتی حکم کے مطابق جسمانی ریمانڈ پر تھے۔
ملزمان کو چھڑوانے کے لیے اُن کے ساتھیوں نے پولیس پارٹی پر حملہ کیا اور اندھا دھند فائرنگ کی۔جس کے بعد اہلکاروں نے جوابی فائرنگ کی۔
پولیس کی فائرنگ کے نتیجے میں دو حملہ آوروں سمیت چار ملزمان ہلاک ہوئے جبکہ 3 حملہ آور فائرنگ کرتے ہوئے فرار ہوگئے، پولیس نے فرار ہونے والے ملزمان کا تعاقب شروع کردیا۔
گرفتار ملزمان نے دورانِ تفتیش اپنے کچھ ساتھیوں کی نشاندہی کی جن کی گرفتاری کے لیے پولیس چھاپہ مارنے جارہی تھی تو راستے میں ہی ملزمان نے اہلکاروں پر فائرنگ شروع کردی۔
یاد رہے کہ ملزمان نےگزشتہ روز فیصل آباد کے علاقے رفیق کالونی میں5سالہ بچےکوزیادتی کے بعد قتل کیا تھا، جس کے بعد پولیس نے واقعے کا مقدمہ درج کر کے دو ملزمان کو گرفتار کیا۔
پولیس نے ملزمان کو عدالت میں پیش کر کے جسمانی ریمانڈ کی استدعا کی تھی جسے جج نے منظور کرلیا تھا۔
دوسری جانب سی پی او نے آئی جی پنجاب کو مقابلے کی رپورٹ ارسال کردی جس میں بتایا گیا ہے کہ ہلاک ہونے والے دو حملہ آوروں کی شناخت عمر اور شبہاز کے ناموں سے ہوئی، دونوں قتل، اقدام قتل اور ڈکیتی کے متعدد مقدمات میں مطلوب تھے۔
رپورٹ میں بتایاگیا ہے کہ 7 حملہ آوروں نے زیادتی اور قتل کے دو ملزمان کو چھڑوانے کے لیے پولیس پر حملہ کیا تھا۔
