سابق آف اسپنر ثقلین مشتاق نے کورونا متاثرین کےلیے پاک بھارت فنڈریزنگ میچ کی تجویز پر بھارتی کرکٹر کپل دیو کی تنقید کو مسترد کردیا۔
چند روز قبل شعیب اختر نے عالمگیر وبا کورونا وائرس کے باعث لاک ڈاؤن کے متاثرین کے لیے پاک بھارت فنڈریزنگ سیریزکروانے کی تجویز دی تھی جس پر کپل دیو نے کڑی تنقید کی تھی۔
بھارتی کرکٹر کی تنقید پر کرارا جواب دیتے ہوئے ثقلین مشتاق نے کہا کہ کرکٹ جنگ نہیں ہےبلکہ ایک کھیل ہے جسے کھیل کی طرح لینا چاہیے۔
پریس ٹرسٹ آف انڈیا سے بات چیت میں ثقلین مشتاق نے کہا کہ ہم اسپورٹس مین کیوں کہتے ہیں؟آپ انہیں ہیروز کہتے ہیں اور ان کا کام کیا ہوتا ہے؟ان کا کام صرف اچھائی کرنا ہے ، ہار جیت کھیل کا حصہ ہے کرکٹ کوئی جنگ نہیں ، اس لیے سمجھتا ہوں کے دونوں ممالک کے درمیان کرکٹ ہونی چاہیئے۔
آف اسپنر کا کہنا تھا کہ یہ کہنا کہ پاکستان کو بھارت کے ساتھ نہ کھیلنے پر نقصان اٹھانا پڑے گا اس معاملے کو دیکھنے کا یہ صحیح طریقہ نہیں ہے ، بڑے منظر نامے پر دیکھا جائے تو کھیل کو دونوں طرف سے فروغ دینا چاہیے کیونکہ مجھے لگتا ہے کہ کھیلنے سے تعلقات میں بہتری کا امکان ہے۔
