کراچی: وزیراعلیٰ سندھ مراد علی کا کہنا ہے کہ صوبے میں کرونا انفیکشن ریٹ 12 سے کم ہو کر 8.15 فیصد ہوا ہے جو اچھی بات ہے۔
تفصیلات کے مطابق وزیراعلیٰ سندھ مراد علی شاہ نے کرونا وائرس کی صورت حال پر اپنے ویڈیو پیغام میں کہا کہ سندھ حکومت نے کرونا وائرس کے کل 4112 ٹیسٹ کیے۔
انہوں نے بتایا کہ 335 نئے کیسز سامنے آئے جو کیے گئے ٹیسٹ کا 8.15 فیصد ہے، کرونا انفیکشن ریٹ 11 اور 12 سے کم ہو کر 8.15 فیصد ہوا ہے،انفیکشن ریٹ کم ہونا اچھی بات ہے۔
مراد علی شاہ کا کہنا تھا کہ کرونا وائرس کے مریضوں کی تعداد 5291 ہے جبکہ 24 گھنٹوں میں مزید 7 افراد انتقال کر گئے جس کے بعد جاں بحق افراد کی تعداد 92 ہوگئی ہے جو کل مریضوں کا 1.73 فیصد ہے۔
* سب سے زیادہ 258کورونا کے نئے مریض شہر کراچی میں رپورٹ ہوئےہیں، وزیراعلیٰ سندھ سید مراد علی شاہ pic.twitter.com/2lGiRL6AWr
— CMHouseSindh (@SindhCMHouse) April 28, 2020
وزیراعلیٰ سندھ نے کہا کہ آج 37 مریض صحت یاب ہو کر اپنے گھروں کو چلے گئے اس طر ح صحت یاب ہونے والے کل مریضوں کی تعداد 963 ہوگئی ہے۔
انہوں نے بتایا کہ گزشتہ 24 گھنٹوں کے دوران بھی سب سے زیادہ 258 کرونا کے نئے مریض کراچی میں رپورٹ ہوئے ہیں جہاں ضلع جنوبی میں 89، ضلع شرقی 53، ضلع وسطی 43، ضلع غربی 24، کورنگی 28 اور ملیر میں 21 نئے مریض سامنے آئے ہیں۔
مراد علی شاہ کا کہنا تھا کہ حیدرآباد میں 17، جیکب آباد میں 10، سکھر اور شکار پور میں 7،7، شہید بینظیرآباد اور ٹنڈو محمد خان میں 6،6 لاڑکانہ اور سانگھڑ میں 5،5 دادو میں 3، نوشہرو فیروز میں ایک مریض رپورٹ ہوا۔
