سہارنپور : بھارت میں ایک سڑک پر کورونا سے متعلق لکھا ہوا ایک جملہ علاقے میں خوف وہراس کا باعث بن گیا، شرپسند عناصر واردات کے بعد فرار ہوگئے۔
تفصیلات کے مطابق بھارتی ریاست اتر پردیش کے ضلع سہارنپور کے تھانہ دیوبند میں اس وقت افراتفری مچ گئی جب کچھ شرارتی عناصر نے بیچ سڑک پر نہ صرف آئی لو یو کورونا” لکھ دیا بلکہ نعرے بازی کرتے ہوئے فرار ہوگئے۔
وبا کے دور میں اس حرکت کی اطلاع پولیس کو ہوئی تو پولیس نے موقع پر پہنچ کر تحقیق شروع کردی جبکہ شرپسند عناصر پولیس کے پہنچنے سے قبل ہی فرار ہوگئے۔
ایک طرف جہاں پورا ملک کورونا وائرس کے خوف میں مبتلا ہے، وہیں کچھ شرپسند عناصر لا علاج مرض کورونا کا نہ صرف مذاق اڑا رہے ہیں بلکہ حکومت کی جانب سے جاری کی جانے والی احتیاطی تدابیر کوبھی پس پشت ڈال رہے ہیں۔
دیوبند کے محلہ فولاد پورہ کے علاقے شاہ جی لال سڑک کی ایک ایسی تصویر سامنے آئی ہے، جہاں کچھ شرپسند عناصر نے گزشتہ رات سڑک پر ‘آئی لو یو کورونا’ لکھ دیا۔
اس جملہ کو پڑھنے سے علاقہ مکینوں میں خوف و ہراس پھیل گیا، اس سلسلے میں ضلع مجسٹریٹ اکھلیش سنگھ نے بتایا کہ اس معاملہ کو سنجیدگی سے لیا جارہا ہے پولیس معاملے کی تحقیقات کر رہی ہے۔ جن لوگوں نے ایسی حرکت کی ہے ان کے خلاف سخت قانونی کارروائی کی جائے گی۔
