اسلام آباد: اسپیکر قومی اسمبلی اسد قیصر کے کرونا ٹیسٹ کی رپورٹ مثبت آگئی جس کی انہوں نے خود ہی تصدیق کی ہے۔
سماجی رابطے کی ویب سائٹ ٹویٹر پر جاری اپنے ایک بیان میں اسد قیصر نے بتایا کہ ٹیسٹ رپورٹ موصول ہونے کے بعد میں نے خود کو گھر میں قرنطینہ کرلیا ہے۔ انہوں نے پوری قوم سے درخواست کی کہ وہ دعاؤں میں یاد رکھیں اور بہت احتیاط کریں۔
اے آر وائی کے پروگرام الیونتھ آور میں میزبان وسیم بادامی کے ساتھ گفتگو کرتے ہوئے اسد قیصر نے بتایا کہ اُن کے صاحبزادے اور صاحبزادی کے کرونا ٹیسٹ بھی مثبت آئے ہیں۔
یاد رہے کہ اس سے قبل 25 اپریل کو متحدہ مجلس عمل کے پلیٹ فارم سے منتخب ہونے والے رکن قومی اسمبلی منیر خان اورکزئی کا کرونا ٹیسٹ مثبت آیا تھا۔ علاوہ ازیں گورنر سندھ نے بھی تصدیق کی تھی کہ اُن کا کرونا ٹیسٹ مثبت آیا۔
میرا کورونا وائرس کا ٹیسٹ مثبت آیا ہے۔ میں نے خود کو اپنے گھر میں قرنطینہ کر لیا ہے۔ میری پوری قوم سے درخواست ہے کہ وہ احتیاط کریں۔
دعا کی درخواست ہے۔— Asad Qaiser (@AsadQaiserPTI) April 30, 2020
قبل ازیں تحریک انصاف کے رکن صوبائی اسمبلی عبدالسلام آفریدی اور سندھ کے وزیرتعلیم سعید غنی بھی کرونا سے متاثر ہوئے تھے، دونوں نے رپورٹ آنے کے بعد احتیاط کی اور وائرس کو شکست دی۔
مزید پڑھیں: رکن قومی اسمبلی منیر خان اورکزئی کرونا وائرس سے متاثر
اس سے پہلے کراچی کے علاقے لیاری سے منتخب ہونے والے ایم ایم اے کے رکن سندھ اسمبلی عبدالرشید نے بھی تصدیق کی تھی کہ اُن کے کرونا ٹیسٹ کی رپورٹ مثبت آئی ہے۔ علاوہ ازیں وزیراعلیٰ خیبرپختونخواہ کے معاونِ برائے بلدیاتی حکومت کامران بنگش کے کرونا ٹیسٹ کی رپورٹ بھی پازیٹیو آئی۔
دوسری جانب نیشنل کمانڈ اینڈ کنٹرول سینٹر برائے کرونا کی جانب سے جاری اعداد و شمار کے مطابق پاکستان میں کرونا کے مصدقہ کیسز کی تعداد 15 ہزار 470 تک پہنچ گئی جن میں سے 358 کیسز گزشتہ چوبیس گھنٹوں میں سامنے آئے۔
ملک بھر میں اب تک کرونا سے ہونے والی اموات اضافے کے بعد 358 تک پہنچ گئیں جبکہ 4 ہزار 105 مریض صحت یاب ہوکر گھروں کو بھی لوٹ چکے ہیں۔
