اسلام آباد : معاون خصوصی زلفی بخاری نے متحدہ عرب امارات میں بیروزگار پاکستانیوں کو مفت وطن واپس لانے اور کامیاب جوان پروگرام کے تحت روزگار دینے کا اعلان کردیا۔
تفصیلات کے مطابق بیرون ملک پھنسے پاکستانیوں کی وطن واپسی کیلئےحکومتی رابطےجاری ہے، معاون خصوصی زلفی بخاری نے قطرمیں پاکستانی کمیونٹی سے ٹیلی کانفرنس کی ، جس میں یواے ای میں بیروزگار پاکستانیوں کو مفت وطن واپس لانے کا اعلان کردیا۔
زلفی بخاری نے کہا کہ متحدہ عرب امارات میں700بیروزگارپاکستانیوں سےکرایانہیں لیاجائےگا، پاکستانیوں کےسفری اخراجات متعلقہ کمپنیاں اداکریں گی۔
معاون خصوصی نے بےروزگارپاکستانیوں کو کامیاب جوان پروگرام کےتحت روزگاردینےکااعلان کرتے ہوئے کہا قطرسے5500 پاکستانیوں کے لئے خصوصی پروازیں چلانے کا فیصلہ کیا ہے آئندہ 2ہفتے میں5پروازوں پرپاکستانیوں کو واپس لایاجائے گا۔
خیال رہے زلفی بخاری نے یو اے ای سے کمپنیوں کو سفری اخراجات ادائیگی کا پابند بنانے کا مطالبہ کیا تھا۔
یاد رہے معاون خصوصی زلفی بخاری نے یو اے ای وزیر ناصر بن تھانی الحمیلی سے ویڈیو لنک رابطہ کیا تھا جبکہ قطر اورسعودی عرب میں بھی اعلیٰ حکام اور پاکستانی سفیروں سے بھی مسلسل رابطے میں ہیں۔
زلفی بخاری نے یو اے ای وزیر سے رابطے میں بیرون ملک پھنسے پاکستانیوں کی وطن واپسی کےمعاملات پر تبادلہ خیال کیا تھا جبکہ متحدہ عرب امارات کی جانب سےپاکستان کی کوششوں کا بھرپور اعتراف کیا گیا۔
یو اے ای حکام نےپاکستان کے اقدامات کی تعریف کرتے ہوئے پاکستانی خصوصی فلائٹ آپریشن کا آغاز زبردست اقدام قرار دیا تھا۔
دونوں ممالک کے رابطوں پر یو اے ای وزارت اوورسیزنے سماجی رابطے کی ویب سائٹ ٹوئٹر پر اپنے پیغام میں کہا تھا کہ پاکستانی شہریوں کے جلد انخلاپر اتفاق کیا گیا ، ابتدائی طور پر ملازمتوں سے برطرف پاکستانیوں کو ترجیحی بنیاد پر بھیجا جائے گا۔
