اسلام آباد : پاکستان میڈیکل ایسوسی ایشن نے خبردار کیا ہے کہ کوروناابھی عروج کی طرف جارہاہے، لاک ڈاؤن میں نرمی سےصورتحال مزید خراب ہوگی۔
تفصیلات کے مطابق پاکستان میڈیکل ایسوسی ایشن کے عہدیداروں نے پریس کانفرنس کی، ڈاکٹراکرام نے کہا کہ ہماری نظر میں کوئی ایک بندہ بھوک کی وجہ سے نہیں مرا، پہلے بھی بتایا تھا کہ ڈبلیوایچ او نے کہا لاک ڈاون سخت کریں، وزیراعظم سےکہتے ہیں سائنس کی دنیا کوسمجھنے کی ضرورت ہے۔
ڈاکٹراکرام کا کہنا تھا کہ لاک ڈاون نرم کررہے ہیں بلکہ دروازے کھول رہے ہیں ، لاک ڈاؤن میں نرمی سے بیماری مزید پھیلے گی، ہم کسی بھی دباؤمیں نہیں آئیں گے، ڈبلیو ایچ او کے پروٹوکول کے خلاف چلنا فائدہ مند نہیں۔
انھوں نے کہا کہ مریض ایک سے دوسرے اسپتال گھوم رہے ہیں،گائیڈلائن نہیں، وفاقی حکومت نے آج سے لاک ڈاؤن میں نرمی کا فیصلہ کیا ہے، پی ایم اے اور دیگر سخت لاک ڈاؤن اور عوامی آگاہی پر زور دے رہی ہیں۔
ڈاکٹراکرام نے مزید بتایا کہ موجودہ صورتحال میں کوروناکاپھیلاؤکراچی میں بڑھےگا، لاک ڈاؤن ہےلیکن کہیں بھی دیکھ لیں کوئی پابندی نظرنہیں آتی، کچھ تقسیم ہورہاہےتووہاں بھی جلوس جمع ہیں، ہم موجودہ لاک ڈاؤن سے مطمئن نہیں، نرمی ہوگی تو نجانے کیا ہوگا۔
ڈاکٹرقیصرسجاد کا کہنا تھا کہ لاک ڈاؤن میں نرمی سےصورتحال اورخراب ہوگی، کیس زیادہ رپورٹ ہورہے ہیں اورلاک ڈاؤن میں نرمی کی جارہی ہے، دنیا بھر میں کیس کم ہونے پر لاک ڈاؤن میں نرمی کی جاتی ہے۔
ڈاکٹر سعید اختر نے کہا کہ تمام ڈاکٹرز 8ہفتوں سے یہی بات کہہ رہے ہیں کورونا کیسز میں اضافہ ہوگا، کورونا خون کی چھوٹی چھوٹی نالیوں کو بند کر دیتا ہے، یہ 19صرف پھیپھڑوں کی بیماری نہیں ہے، جن لوگوں کوعلامات نہیں وہ بھی بہت زیادہ احتیاط کریں۔
ان کا کہنا تھا کہ کوروناابھی عروج کی طرف جارہا ہے، لاک ڈاؤن کھولنا خطرناک ہوگا، یہ بیماری گردوں، دل اور دیگر اعضا کو متاثر کرسکتی ہے۔
