لاہور: پنجاب اسمبلی کے ڈپٹی اسپیکر دوست محمد مزاری کے کرونا وائرس ٹیسٹ کی رپورٹ مثبت آگئی، ان کے علاوہ اسمبلی کے 3 ملازمین میں بھی وائرس کی تصدیق ہوئی ہے۔
تفصیلات کے مطابق پنجاب اسمبلی کے ڈپٹی اسپیکر دوست محمد مزاری میں کرونا وائرس کی تصدیق ہوگئی، ان کے علاوہ اسمبلی کے مزید 3 ملازمین میں بھی کرونا وائرس کی تصدیق ہوئی ہے۔
ذرائع کا کہنا ہے کہ ڈپٹی اسپیکر اور مذکورہ ملازمین نے متعدد وزرا اور ارکان اسمبلی سے ملاقات بھی کی تھی، 2 روز قبل اجلاس میں آنے والے افراد اور سرکاری ملازمین کے ٹیسٹ لیے گئے تھے۔
ترجمان پنجاب اسمبلی سیکرٹریٹ کا کہنا ہے کہ معاملے پر فی الحال بات نہیں کرسکتے، کل مزید تفصیلات بتائی جائیں گی۔
خیال رہے کہ اس سے قبل اسپیکر قومی اسمبلی اسد قیصر میں بھی کرونا وائرس کی تصدیق ہوئی تھی۔
اپنے ٹویٹ میں اسد قیصر نے بتایا تھا کہ ٹیسٹ رپورٹ موصول ہونے کے بعد میں نے خود کو گھر میں قرنطینہ کرلیا ہے۔ قوم سے دعاؤں کی درخواست ہے اور درخواست ہے کہ خود بھی احتیاط کریں۔
اسد قیصر کے صاحبزادے اور صاحبزادی میں بھی کرونا وائرس کی تصدیق ہوئی تھی۔
قبل ازیں تحریک انصاف کے رکن صوبائی اسمبلی عبدالسلام آفریدی اور سندھ کے وزیر تعلیم سعید غنی بھی کرونا سے متاثر ہوئے تھے، دونوں نے رپورٹ آنے کے بعد احتیاط کی اور وائرس کو شکست دی۔
کراچی کے علاقے لیاری سے منتخب ہونے والے ایم ایم اے کے رکن سندھ اسمبلی عبدالرشید اور وزیر اعلیٰ خیبر پختونخواہ کے معاون برائے بلدیاتی حکومت کامران بنگش میں بھی کرونا وائرس کی تصدیق ہوئی تھی۔
