اسلام آباد : چینی سفیر نے وفاقی وزیرآئی ٹی سید امین الحق سے ملاقات میں کہا کہ پاکستان کےساتھ آئی ٹی وٹیلی کام سیکٹرمیں تعاون بڑھائیں گے اور چین کورونا سے نمنٹے کیلئے پاکستان کی ہرممکن مدد کرتا رہے گا۔
تفصیلات کے مطابق وفاقی وزیرآئی ٹی سید امین الحق سے چین کے سفیر ژاؤ جنگ کی ملاقات ہوئی ، ملاقات میں باہمی دلچسپی،انفارمیشن ٹیکنالوجی،ٹیلی کمیونیکیشن کےامورزیر بحث آئے۔
وفاقی وزیرآئی ٹی سید امین الحق نے کہا کہ پاکستان اورچین میں گہرےدوستانہ تعلقات ہیں،جومزید مستحکم ہوں گے، پاکستان اورچین آئی ٹی، ٹیلی کام سیکٹرمیں تعاون بڑھانابہت اہم ہے، پاکستان آئی ٹی سیکٹر میں چین کےتجربات سےاستفادہ کرناچاہتاہے۔
چینی سفیر کا کہنا تھاکہ پاکستان کےساتھ آئی ٹی وٹیلی کام سیکٹرمیں تعاون بڑھائیں گے، مشکل وقت میں چین کورونا سے نمنٹے کیلئے پاکستان کی ہرممکن مدد کرتا رہے گا۔
گذشتہ روز آرمی چیف جنرل قمر جاوید باجوہ سے چینی سفیر نے جی ایچ کیو میں ملاقات کی تھی ، اس موقع پر آرمی چیف جنرل قمر جاوید باجوہ کا کہنا تھا کہ چین نے کورونا وباء کے تناظر میں پاکستان کو فوری طبی امداد دی، چین نے وبا سے نمٹنے کیلئے اپنے طبی ماہرین کو پاکستان بھیجا۔
آرمی چیف نے چین سے فوری طبی آلات کی فراہمی پر اظہار تشکر کیا اور چینی طبی ماہرین کی پاکستان آمد اور تعاون کو سراہا۔
چینی سفیر نے ہر فورم پر پاکستان کی حمایت کی یقین دہانی کرائی، آرمی چیف کا چین کی فوری میڈیکل سپلائی کی فراہمی پر بھی شکریہ ادا کیا۔
