کراچی : صوبہ سندھ میں شاپنگ پلازہ کھولنے کا معاملے پر اہم پیشرفت ہوئی ہے، وفاقی حکومت نے شاپنگ پلازہ کھولنے کیلئے سندھ حکومت کو اجازت دے دی۔
تفصیلات کے مطابق وفاقی وزارت نیشنل ہیلتھ ریگولیشنز کا جوابی خط سندھ حکومت کو موصول ہوگیا ہے جس میں کہا گیا ہے کہ نیشنل کمانڈ اینڈ آپریشن سینٹر نے سندھ حکومت کی درخواست کا جائزہ لیا ہے، جس کے بعد فیصلہ کیا گیا کہ سندھ میں شاپنگ پلازہ کھولنے پروزارت ہیلتھ سروسز کو کوئی اعتراض نہیں۔
خط کے متن میں کہا گیا ہے کہ صوبہ سندھ میں شاپنگ پلازہ کھول دیئے جائیں، اس دوران سندھ حکومت ایس او پیز پر سختی سے عملدرآمد کرائے۔
اس کے علاوہ صوبائی حکومت تمام ضروری حفاظتی اقدامات کو بھی یقینی بنائے، نوٹیفکیشن کے مطابق عدالتی حکم پر محکمہ داخلہ سندھ نے شاپنگ مال کھولنے کی اجازت دے دی۔
حکم نامہ میں واضح ہدایات دی گئی ہیں کہ شاپنگ مال کھولنا ایس او پیز پرعملدرآمد سےمشروط ہے، شاپنگ مال میں بیوٹی پارلر، سیلون، پلےایریا، فوڈ کورٹ بدستور بند رہیں گے۔
سپریم کورٹ کے حکم کے مطابق دکانیں جمعہ، ہفتہ،اتوارکو بھی کھلی رہ سکیں گی، دکانوں کےاوقات کارصبح8سےشام5بجےہی ہوں گے۔
