اسلام آباد: قومی فضائی کمپنی پی آئی اے نے بیرون ملک سفر کرنے والوں کے لیے اہم ہدایات جاری کر دیں۔
قومی ایئرلائن کے ترجمان کا کہنا ہے کہ وہ تمام مسافر جو پی آئی اے کی پروازوں سے برطانیہ کے لئے سفر کر رہے ہیں ان سے گزارش کی جاتی ہے کہ وہ آن لائن برطانوی پبلک ہیلتھ پسنجر لوکیٹر فارم پُر کر کے اس کی کاپی اپنے ہمراہ رکھیں اور برطانیہ ائر پورٹ آمد پر متعلقہ عملے کو فراہم کریں۔
ترجمان کے مطابق مسافروں کو چیک ان کاؤنٹر اور بورڈنگ سے قبل مطلوبہ فارم کی کاپی دکھا کر طیارے میں سوار ہونے کی اجازت ہو گی۔
برطانوی حکومت نے برطانیہ پہنچنے والے تمام مسافروں کے لئے 14 دن کا قرنطینہ لازمی قرار دیا ہے وہ مسافر جو برطانیہ کا سفر کر رہے ہیں وہ روانگی سے قبل آن لائن پبلک ہیلتھ لوکیٹر فارم لازمی پرُکریں۔
برطانیہ آمد پر بارڈر حکام کی جانب سے اس کی کاپی طلب کی جائے گی۔
واضح رہے کہ حکومت نے برطانیہ و امریکا سمیت دیگر ممالک کے لیے فضائی آپریشن بحال کررکھا ہے اور کورونا وبا کے دوران خصوصی حفاظتی اقدامات کیے گئے ہیں۔
