اسلام آباد: بھارت نے مسلسل جگ ہنسائی کے بعد سوشل میڈیا کا سہارالیا اور اے آر وائی نیوز کا نام استعمال کر کے شرانگیزی پھیلانے کی ناکام کوشش کی۔
اتوار کی صبح سے بھارت کے مختلف سوشل میڈیا اکاؤنٹس پر ایک تصویر وائرل ہونا شروع ہوئی جسے اے آر وائی نیوز کا بتانے کی کوشش کی گئی، یہ اسکرین شاٹ متعدد بھارتی ویب سائٹس نے اپنی خبر میں استعمال کیا اور پروپیگنڈا کرنے کی ناکام کوشش کی۔
انٹرنیٹ پر شیئر ہونے والے خبر کے اسکرین شاٹ میں لکھا گیا کہ ’پاکستانی بحریہ کی آبدوز نے ماہی گیروں کی ایک کشتی کو بھارتی بحریہ کا جہاز سمجھ لیا‘۔
اسکرین شاٹ کے مطابق پاک بھارت تعلقات میں کشیدگی اور کراچی میں بلیک آؤٹ کی افواہوں کے بعد ایک بڑا حادثہ ہوتے ہوتے رہ گیا جب اتوار کی صبح پاک بحریہ کی آبدوز پی این ایس سعد نے کراچی کی طرف جانے والی ماہی گیروں کی کشتی کو بھارتی بحریہ کا جہاز سمجھ لیا۔
فیکٹ چیک
بھارتی سوشل میڈیا کی بدنیتی پر مشتمل یہ خبر نہ تو سچ ہے، نہ ہی اے آر وائی نیوز سمیت کسی پاکستانی میڈیا آؤٹ لیٹ نے اس نوعیت کی کوئی خبر رپورٹ کی۔
اسکرین شاٹ میں بیان کی گئی کراچی میں’بلیک آؤٹ کی افواہیں‘ بھی ایک گمراہ کن پہلو ہے کیونکہ پاکستان میں گزشتہ چند روز میں اس نوعیت کا کوئی واقعہ پیش نہیں آیا۔
بھارتی سوشل میڈیا پر شیئر ہونے والا اسکرین شاٹ اس بات کی غمازی کرتا ہے کہ مودی سرکار جنگی جنون میں مبتلا ہے اور وہ خطے کو آگ میں جلتا دیکھنے کا خواہش مند بھی ہے۔
خیال رہے کہ بھارت کی لائن آف کنٹرول کی خلاف ورزیوں کے بعد دونوں ممالک کے تعلقات ایک بار پھر کشیدہ ہیں۔ دو روز قبل گلگت بلتستان سے 2 بھارتی جاسوس بھی گرفتار کیے گئے ہیں۔
ایس ایس پی گلگت بلتستان مرزا حسن کے مطابق سیکیورٹی فورسز نے 2 بھارتی جاسوسوں کو گرفتار کیا، گرفتار جاسوسوں کا نام نور محمد وانی اور فیروز احمد لون ہے اور ان کا تعلق مقبوضہ کشمیر سے ہے۔
سینئر سپرٹنڈنٹ آف پولیس مرزا حسن کا کہنا تھا کہ دونوں بھارتی جاسوسوں کو بھارت نے زبردستی لائن آف کنٹرول (ایل او سی) پار کروایا تھا۔
