کراچی: شہر قائد میں لاک ڈاؤن کے باعث کاروبار بند ہونے سے کیٹرز اینڈ ڈیکوریٹرز ایسوسی ایشن نے سڑک پر دیگیں رکھ کر انوکھا احتجاج کیا۔
تفصیلات کے مطابق کراچی میں کیٹرز اینڈ ڈیکوریٹرز ایسوسی ایشن کی جانب سے انوکھا احتجاج کیا گیا۔مظاہرین دیگوں کے ساتھ سڑک پر آگئے،مظاہرین نے ہاتھوں میں پلے کارڈ بھی اٹھا رکھے تھے۔
کاروبار کی بندش سے پریشان پکوان سینٹر کے مالکان کا کہنا تھا کہ لاک ڈاون کے باعث تقاریب پر پابندی سے کاروبار ٹھپ ہوگیا ہے، لاک ڈاون کے بعد سے ملازمین کو اپنی جیبوں سے تنخواہیں ادا کر رہے ہیں۔
مظاہرین کے مطابق کئی ماہ ہوگئے کوئی آرڈر نہیں آرہا، کاروبار نہ ہونے سے کوئی آمدنی نہیں مگر خرچے اپنی جگہ پر ہیں، دکان کا کرایہ، یوٹیلیٹی بل اور دیگر اخراجات کہاں سے پورے کریں، دکانوں کے کرائے بھی جیبوں سے ادا کر رہے ہیں،اگر یہی صورتحال رہی تو ہم تباہ ہوجائیں گے۔
کیٹرز اینڈ ڈیکوریٹرز ایسوسی ایشن نے سندھ حکومت سے دیگر شعبوں کی طرح کاروبار کی اجازت دینے کا مطالبہ کیا اور ساتھ ہی حکومت کی تمام ایس او پیز پر عمل درآمد کی بھی یقین دہانی کروائی۔
