اسلام آباد : وزارت صحت نے ڈیکسا میتھازون کی فروخت کیلئے شرائط عائد کر دیں، جس میں کہا صرف ڈاکٹری نسخہ لانےوالے مریض کو دی جائے اور میڈیکل اسٹور نسخے کی کاپی بطورریکارڈپاس رکھیں۔
تفصیلات کے مطابق وزارت صحت کی جانب سے ڈیکسا میتھازون کی فروخت کیلئے شرائط عائد کر دیں ، وزارت قومی صحت نے اسلام آباد کی فارمیسیز، میڈیکل اسٹورز کے نام مراسلہ جاری کردیا ہے۔
مراسلے میں کہا گیا ڈیکسا میتھازون صرف ڈاکٹری نسخہ لانےوالے مریض کو دی جائے اور ڈاکٹری نسخے کے بغیر ڈیکسا میتھازون فروخت نہ کی جائے، فارمیسز ڈیکسا میتھازون کی فروخت کا مکمل ریکارڈ محفوظ رکھیں، میڈیکل اسٹورہر گاہک سےڈاکٹر نسخے کی کاپی بطورریکارڈپاس رکھیں۔
وزارت صحت کا کہنا ہے کہ اسلام آباد میں ڈیکسا میتھازون کی قلت کی اطلاعات ہیں، ڈسٹریبیوٹرز،فارمیسز، ڈیکسا میتھازون کی دستیابی یقینی بنائیں، ڈریپ نے ڈیکسا میتھازون کی مخصوص قیمت مقرر کررکھی ہے، دوا کی مقررہ سے زائد قیمت پر فروخت ممنوع و جرم ہے۔
مراسلے کے مطابق میڈیکل اسٹورز ڈیکسا میتھازون گولی اور انجکشن کی دستیابی یقینی بنائیں، ڈیکسا میتھازون صرف کوروناکےتشویشناک مریضوں کودی جاتی ہے، میڈیکل اسٹور پر گاہکوں کو دوا سے متعلق آگاہی فراہم کی جائے۔
وزارت صحت کی جانب سے مراسلے میں کہا گیا قانون شکن ڈسٹریبیوٹر، میڈیکل اسٹورکےخلاف سخت کارروائی ہوگی۔
