کراچی: وزیراعلیٰ سندھ مراد علی شاہ نے کہا ہے کہ کے الیکٹرک،حیسکو اور سیپکو نے عوام کی زندگی مشکل بنا دی ہے۔
تفصیلات کے مطابق کراچی میں وزیراعلیٰ سندھ مراد علی شاہ کی زیر صدارت اہم اجلاس ہوا جس میں صوبائی وزرا، مشیر قانون شریک ہوئے۔ وزیراعلیٰ سندھ نے وزرا کو اپنی کارکردگی مزید بہتر کرنے کی ہدایت کی۔
مراد علی شاہ کا کہنا تھا کہ کرونا کراچی کے علاوہ دیگر اضلاع میں بھی بڑھ رہا ہے،کرونا کو کنٹرول کرنے کے لیے عوام کو مزید آگاہی دینے کی ضرورت ہے، علمااور مشائخ اپنے خطبوں میں عوام کو ایس اوپیز پر عمل کرنےکی ہدایت کریں۔
وزیراعلیٰ سندھ نے صوبے میں بڑھتی لوڈشیڈنگ پرتشویش کا اظہار کرتے ہوئے کہا کہ کے الیکٹرک،حیسکو اور سیپکو نے عوام کی زندگی مشکل بنا دی ہے۔انہوں نے شدیدگرمی اور آئسولیشن کے ماحول میں وفاق سے لوڈ شیڈنگ فوری ختم کرنے کا مطالبہ کیا۔
مراد علی شاہ نے اجلاس کے دوران بلدیاتی اداروں، واٹر بورڈ، واسا،ضلعی انتظامیہ کو متحرک کرنے کی ہدایت کر دی۔
